यावल (जळगाव) : तालुक्यातील प्रसिद्ध मुंजोबा महाराज देवस्थानावर कोरोनाच्या पार्श्वभूमीवर प्रशासनाच्या आदेशानुसार यात्रोत्सव रद्द असतानाही सोमवारी (ता. २२) भाविकांची गर्दी उसळली होती. तहसीलदार महेश पवार, पोलिस निरीक्षक सुधीर पाटील व पोलिसांनी गर्दीला पांगवून मंदिरास टाळे ठोकले. तसेच विश्वस्त समितीने याबाबत उपाययोजना न केल्याचा ठपका ठेवत महसूल विभागाने विश्वस्त समितीकडून दहा हजार दंड वसूल केला. तहसीलदार महेश पवार यांनी दुजोरा दिला आहे. 
याशिवाय गंगानगरमध्ये एका विवाह सोहळ्यात आणि माधवनगरात एका जावळाच्या समारंभात ५० पेक्षा जास्त व्यक्ती आढळून आल्याने पालिका प्रशासनाकडून दोघे ठिकाणी प्रत्येकी पाच हजार रुपये प्रमाणे दहा हजार रुपये दंड वसूल करण्यात आला. तसेच शहरात तेरा दुकानदारांकडून प्रत्येकी पाचशे प्रमाणे एकूण साडेसहा हजार रुपये दंड वसूल करण्यात आला. येथे तब्बल साडेसव्वीस हजाराचा दंड वसूल आला आहे. पोलिस प्रशासनाने कारवाई करत ३१ जणांकडून प्रत्येकी दोनशे प्रमाणे सहा हजार दोनशे रुपयाचा दंड वसूल केला आहे. तर गेल्या दोन दिवसात ३० जणांकडून प्रत्येकी पाचशे रुपये प्रमाणे १५ हजाराचा दंड वसूल केला होता. कोरोनाचा संसर्ग वाढू नये, यासाठी शासनाकडून अलर्ट जारी करण्यात आला आहे. 

कडक कारवाईचा इशारा
लग्नसराईत गर्दी वाढू नये, यासाठी पालिका व पोलिस प्रशासन यांची करडी नजर असून, विवाह सोहळ्यात नियमांचे पालन, सामाजिक अंतर किंवा मास्क न लावलेली व्यक्ती आढळल्यास कारवाई केली जात आहे. आदेशाचे उल्लंघन केल्यास कडक कारवाई करण्याचा येईल, असा इशारा पोलिस निरीक्षक सुधीर पाटील यांनी दिला आहे.

संपादन ः राजेश सोनवणे