मेहुणबारे (ता.चाळीसगाव): गिरणा पट्ट्यात बिबट्याची (Leopards) दहशत असतांना चोरट्यांनी घातलेल्या धुमाकूळमुळे या परिसरात शेतकरी (Farmers) अक्षरशा हतबल झाले आहेत. एका पाठोपाठ एक गुरे चोरीच्या (Theft) घटना घडत असून या वाढत्या घटनांमुळे शेतकऱ्यांरी मेटाकुटीला आले आहेत.वरखेडे (ता.चाळीसगाव) येथे एक बैल व दोन गायी चोरीला गेल्यामुळे शेतकऱ्यांमध्ये भीती पसरली आहे.

वरखेडे(ता.चाळीसगाव) शिवारात अनेक दिवसापासून बिबट्याची दहशत आहे.रात्री अपरात्री केव्हाही नागरीकांना बिबट्याचे ओझरते दर्शन होते मध्यंतरी बिबट्याने हिंस्त्र प्राण्यांसह वासरे, बकऱ्यांवर फडशा पाडला होता. परिसरात बिबट्याचा लपंडाव सुरू असल्याने भयभीत झालेले नागरीक रात्री शेतात गुरांची राखण करण्यास धजावत नाहीत. परिणामी याचा फायदा गुरेचोरांनी घेतला आहे. गेल्या चार सहा महिन्यात वरखेडे भागात गुरे चोरीच्या काही घटना घडल्या आहेत. वरखेडे येथील जयसिंग कच्छवा यांचे एक बैल व दोन गायी चोरीस गेले श्री कच्छवा हे रात्री नेहमी गुरांजवळ झोपत होते. बिबट्याच्या भीतीने ते शेतात गेले नाही आणि तीच संधी चोरट्यांनी साधली. भरधाव वाहनातून आलेले चोरटे पहाटेच्या वेळी डाव साधतात व रस्त्यांच्या बाजुला असलेल्या शेतांमधील दावणीला बांधलेले गुरे चोरून नेत त्याच रस्त्याने भरधाव धूम ठोकतात.

शेतकरी हतबल ...

गुरे चोरीच्या या वाढत्या घटनांमुळे शेतकरी हतबल झाले आहेत.आधीच कोरोनाचा मार त्यात सततच्या पावसामुळे खरीप पिकांचे अतोनात नुकसान झाल्याने शेतकरी चिंतेत असतांना बहुमोल किंमतीचे गुरे चोरीस जात असल्याच्या प्रकारानेे शेतकरी धास्तवाले असुन मेहुणबारे पोलिसांच्या रडारवर ही गुरे चोरणारी टोळी असुन त्यादृष्टीने रात्रीची गस्त देखील वाढविण्यात आल्याचे पोलिसांनी सांगितले.

चोरीचे प्रयत्न फसले

यापूर्वीही या भागात चोरट्यांनी गुरे चोरीचे प्रयत्न केले आठ दिवसापूर्वी तिरपोळे रस्त्यावर चोरट्यांनी दावणीला बांधलेले जनावरांचे दोर कापण्याचा प्रयत्न करीत असतांना तेथे झोपलेल्या लोकांना जाग आली व त्यांनी आरडाओरड केल्याने चोरटे पळून गेले. तर 15 दिवसापूर्वीही धामणगाव रस्त्यावर असाच प्रकार घडला होता. म्हशींच्या गोठ्यावर रात्रीच्या सुमारास चोरटे आले पण चोरटे आल्याची चाहूल लागल्यावर तेथील मजुरांनी आरडाओरड केल्याने चोरटे पळून गेले.या चोरट्यांचा बंदोबस्त करावा अशी मागणी होत आहे.