फैजपूर : गेल्या काही वर्षांपासून गटारीच्या समस्येने त्रस्त असलेल्या शहरातील श्रीकृष्णनगरमधील संतप्त नागरिकांनी (Angry citizens) थेट पालिका (Municipality) कार्यालय गाठून पालिकेच्या बांधकाम विभागात गटारातील (Construction Department) चिखल फेकून संताप व्यक्त केला. यामुळे पालिकेचा नियोजनशून्य कारभार चव्हाट्यावर आला आहे.

गेल्या काही वर्षांपासून श्रीकृष्णनगरमधील नागरिक गटारींच्या समस्येने त्रस्त असल्याने पालिकेकडे वारंवार अर्ज करूनही पालिकेकडून उपाययोजना झाली नाही. सध्या पावसाळ्याचे दिवस आहेत. साथीच्या आजारांचादेखील फैलाव होत असल्याने या भागात गटारींअभावी सांडपाण्याचा योग्य निचरा होत नसल्याने गटारींची समस्या कायम असल्याने वर्षांनुवर्षे गटारीच्या समस्येला त्रस्त असलेल्या श्रीकृष्णनगरमधील नागरिकांनी गटारीमधील चिखल व सांडपाणी बादल्यांमध्ये आणून बुधवारी साडेअकराला थेट पालिका कार्यालय गाठले व पालिकेच्या बांधकाम कार्यालयात गटारीमधील चिखल व सांडपाणी फेकून रोष व्यक्त केला. पालिकेला जाग आणण्यासाठी नागरिकांनी २७ सप्टेंबरपासून उपोषणाला बसण्याचा इशारा या वेळी लेखी अर्जाद्वारे दिला आहे. या वेळी बांधकाम विभागाचे अभियंता मुश्तहिद फारुकी, काँग्रेस गटनेता कलीम खाँ मण्यार यांनी नागरिकांची समजूत घालण्याचा प्रयत्न केला, तर नगरसेवक अमोल निंबाळे यांनी नागरिकांची बाजू मांडली.

आरोग्य निरीक्षकांवर कारवाईची मागणी
फैजपूर पालिकेचे आरोग्य निरीक्षक लक्ष्मण चावरे यांच्यावर शिस्तभंगाची कारवाई करण्याची मागणीची राष्ट्रवादी काँग्रेसचे गटनेता शेख कुर्बान यांनी निवेदनाद्वारे केली आहे. गटनेता शेख कुर्बान व पाच-सहा नगरसेवक मंगळवारी सायंकाळी चारच्या सुमारास मुख्याधिकाऱ्यांच्या दालनात गावातील कचरा व गटारी तुंबलेल्या गटारींची तक्रार देण्यासाठी गेले असता आरोग्य निरीक्षक चावरे यांनी नगरसेवकांसमोर अरेरावी व उद्धट भाषेचा वापर केल्याचा आरोप शेख कुर्बान यांनी मुख्याधिकारी यांच्याकडे लेखी स्वरूपात तक्रार करून केला आहे.