अमळगाव (जळगाव) : अनुसूचित महिला प्रवर्गासाठी राखीव असलेल्‍या जागेवर बिनविरोध निवडून आलेल्‍या लोकनियुक्‍त सरपंचावर सदस्‍यांनी अविश्‍वास ठराव मांडला. लागलीच सभा होवून आज (ता. २९) दहा विरुद्ध नऊ असा पारित झाला असून, एक सदस्य गैरहजर राहिला होता. (jalgaon-amalgaon-grampnachayat-no-confidence-motion-of-the-elected-sarpanch-was-passed)

अमळगाव (ता.अमळनेर) सरपंच व सदस्यपदाची निवडणूक तीन वर्षांपूर्वी धुमधडाक्याने झाली. यात सरपंचपद अनुसूचित महिला प्रवर्गासाठी राखीव होते. या निवडणुकीत वसंत मोरे यांच्या पत्नी छाया मोरे या बिनविरोध निवडून आल्या होत्या. पण गेल्या अडीच वर्षांपासून गावात विकासकामे होत नसल्याचा दहा सदस्यांनी ठपका ठेवत त्यांच्यावर अविश्वास प्रस्ताव दाखल करण्यात आला होता. तो मंगळवारी (ता. २९) दहा विरुद्ध नऊ असा पारित झाला असून, एक सदस्य गैरहजर राहिला होता.

सदस्यांमध्ये धुसफूस

अमळगाव ग्रामपंचायतीत एकूण अकरा सदस्य असून, गेल्या काही दिवसांपासून ग्रामपंचायत कारभाराविषयी सदस्य समाधानी नसल्याने सदस्यांमध्ये धुसफूस सुरू होती. त्यात महिला सरपंच असल्याने त्यांचे पती कारभारात ढवळाढवळ करीत असल्याचा ठपका ठेवत व विकासकामांचा निधी पडून असूनही विकासकामे होत नसल्याचा ठपका ठेवत दहा विरुद्ध नऊ असा प्रस्ताव पारित करीत लोकनियुक्त सरपंचांना पायउतार व्हावे लागले. एक सदस्य गैरहजर राहिला होता. यासाठी पीठसीन अधिकारी म्हणून तहसीलदार मिलिंद वाघ यांनी काम पाहिले तर त्यांना गावाचे तलाठी पराग पाटील यांनी मदत केली. तसेच ग्रामसेवक वाघ यांनीही कामकाजात मदत केली.