जळगाव ः तामसवाडी (ता. पारोळा) येथील बोरी मध्यम (Bori Dam) प्रकल्पाची सध्याची पाणी पातळी २६७.०५ मिटर इतकी आहे. एकुण जीवंत साठा ९८.३० टक्के इतका झाला आहे. तर जळगाव जिल्ह्यातील इतर धरणांमधील पाणी पातळी मात्र चिंता वाढवणारी आहे.

बोरी धरणाच्या पाणलोट क्षेत्रात पाऊस झालेला असल्याने धरणातील पाणीसाठ्यात 98.30% इतका पाणीसाठा झाला आहे. धरणाच्या पाणीसाठ्यात वाढ होत असून धरणाचे सुरक्षिततेच्यादृष्टीने पुराचे पाणी नदी पात्रात सोडण्यासाठी धरणाचे दरवाजे केव्हाही उघडून पुराचा विसर्ग नदीपात्रात सोडण्यात येईल.

बोरी धरणाचे खालील बोरी नदी काठावरील गावांमधील नागरिकांना सतर्कतेचा इशारा देण्यात येत आहे. बोरी नदीपात्रामध्ये कुणीही आपली गुरेढोरे सोडू नये अथवा नदी पात्रामध्ये जाऊ नये. जीवित वा वित्तहानी टाळण्याचे दृष्टीने योग्य ती खबरदारी घेण्यात यावी. असे गिरणा पाटबंधारे विभागाने कळविले आहे.