भडगाव (जळगाव) : खेडगाव (ता. भडगाव) येथील इंडो- तिबेटियन (आयटीबीपी) सेनेत कार्यरत असलेले जवान मंगळवारी कर्तव्य बजावताना हुतात्मा झाला. सुनील यशवंत हिरे (वय ४०) हे आसाम येथे सेवेत होते. दरम्यान, आज सायंकाळपर्यंत त्यांचे पार्थिव खेडगाव येथे येण्याची शक्यता आहे. (jalgaon-chalisgaon-taluka-soldier-Death-aasam-service)

याबाबत जवानाच्या नातेवाइकांकडून मिळालेली माहिती अशी, की खेडगाव खुर्द (ता. भडगाव) येथील सुनील यशवंत हिरे (वय ४०) हे भारतीय इंडो- तिबेटियन बटालियन २५ अर्थात आयटीबीपी सेनेत कार्यरत होते. त्यांनी पश्चिम बंगाल येथील निवडणुकीत सेवा बजावल्यानंतर ते आसाम येथील डिब्रगड येथे सध्या कार्यरत होते. दरम्यान, कर्तव्य बजावताना मंगळवारी (ता. २२) वीरमरण आले. याबाबत तालुका प्रशासनाकडे अधिकृतरीत्या काही माहिती उपलब्ध होऊ शकली नाही.

आठ महिन्‍यांनी होणार होते निवृत्‍त

आसामहून त्यांचे पार्थिव बुधवारी सायंकाळपर्यंत खेडगाव येथे येण्याची शक्यता आहे. मात्र, यास अधिकृतरीत्या दुजोरा मिळू शकलेला नाही. जवान सुनील हिरे हे २२ वर्षांपासून देशसेवेत कार्यरत होते. पुढच्या आठ महिन्यांत ते सेवेतून निवृत्त होणार होते. मात्र, त्यांना वीरमरण आल्याने खेडगाव पंचक्रोशीत हळहळ व्यक्त केली जात आहे. त्यांच्या मागे पत्नी, आई, वडील, एक बारा वर्षांचा, तर दुसरा आठ वर्षांचा मुलगा असल्याचे त्यांचे चुलत बंधू संजय हिरे यांनी सांगितले.