जळगाव : शहरातील गोविंदा रिक्षा स्टॉप ते शाहूनगर रस्त्यावर रात्रीच्या वेळी रुग्णवाहिकेतून (Ambulance) येत चारचाकी चोरीचा प्रयत्न (Car Theft) करणाऱ्या दोघा भामट्यांना शहर पोलिसांनी अटक केली. अटकेतील संशयितांनी छाबडा एजन्सीज बाहेर उभी कार चोरण्यासाठी वापर केलेली रुग्णवाहिका जप्त करण्यात आली. भुसावळ येथील कुणाल हातकर छाबडा सर्जिकल एजन्सीजमध्ये व्यवस्थापक पदावर कार्यरत आहेत. वैद्यकीय साहित्य खरेदीसाठी हटकर मालकासह बुधवारी (ता. २५) कारने (एमएच १९ बीजे ०५५४) गोल्ड सिटी हॉस्पिटलसमोर लावून इंदूरला गेले होते. दोन दिवसांनंतर परत आल्यावर भुसावळला त्यांच्या घरी कारने जात असताना त्यांना कारचे चारही दरवाजे उघडण्याचा प्रयत्न झाल्याचे आढळले. तसेच दरवाजाचे हँडल वाकलेले, व्हायफर काढून टाकलेले आढळून आले.

सीसीटीव्हीत चोरटे कैद
श्री. हातकर यांनी घडला प्रकार दुकान मालक विनय चौधरी यांना सांगितला. त्यांनी दुकानाबाहेर लागलेल्या सीसीटीव्हीची धुंडाळणी केल्यावर रुग्णवाहिकेमधून आलेले दोन भामटे कार उघडताना आढळून आले. त्यावरून कुणाल हातकर यांनी शहर पोलिस ठाणे गाठून तक्रार दिली.

गुन्हा दाखल होण्यापूर्वीच अटकेत
हातकर यांची तक्रार ऐकून घेतल्यावर निरीक्षक विजयकुमार ठाकूरवाड यांच्या मार्गदर्शनात तेजस मराठे, योगेश इंधाटे, गजानन बडगुजर, राजकुमार चव्हाण, उमेश भांडारकर यांच्या पथकाने सीसीटीव्ही फुटेजच्या आधारे संशयितांचा शोध सुरू केला. शहरातील भजे गल्लीत संशयिताची रुग्णवाहिका आढळून आली. दोघांना ताब्यात घेत चौकशी केल्यावर योगेश बाजड (रा. गेंदालाल मील) व दिनेश राठोड (रा. वाघनगर) या दोघांना अटक करण्यात आली.