जळगाव ः जिल्ह्यात सध्या दोन्ही पालक गमावलेल्या बालकांची (Children) संख्या नऊ असून, पैकी सात बालके १८ वर्षांच्या आतील, तर दोन बालके १८ वर्षांवरील आहेत. एक पालक मृत्यू (Death) पावलेल्या बालकांची संख्या १९१ आहे. जिल्ह्यात कोरोनामुळे (Corona) एक किंवा दोन्ही पालक गमावलेली बालके, त्यांच्या कुटुंबांना शासकीय यंत्रणांनी आवश्यक त्या सुविधांसह शासनाच्या विविध योजनांचा लाभ मिळवून द्यावा, असे आदेश कृती दलाचे अध्यक्ष तथा जिल्हाधिकारी अभिजित राऊत (Collector Abhijit Raut) यांनी बुधवारी (ता. २) येथे दिले.

(jalgaon district one hundred ninety one children parents death)

जिल्हाधिकारी कार्यालयातील सभागृहात कोरोनामुळे पालक गमावलेल्या बालकांच्या काळजीसाठी गठित जिल्हास्तरीय कृती दलाच्या बैठकीत ते बोलत होते. जिल्हा परिषदेचे मुख्य कार्यकारी अधिकारी डॉ. बी. एन. पाटील, महापालिका आयुक्त सतीश कुलकर्णी, जिल्हा शल्यचिकित्सक डॉ. एन. एस. चव्हाण, जिल्हा आरोग्याधिकारी डॉ. भीमाशंकर जमादार, जिल्हा महिला व बालविकास अधिकारी विजयसिंग परदेशी उपस्थित होते. पोलिस निरीक्षक बापू रोहोम, जिल्हा बालकल्याण समितीच्या वैजयंती तळेले व इतर अधिकारी दूरदृश्यप्रणालीद्वारे सहभागी झाले होते.जिल्हाधिकारी राऊत म्हणाले, की कोरोनामुळे दोन्ही पालक गमावलेल्या बालकांना त्यांचे न्याय्य हक्क मिळवून देत त्यांच्या संगोपनासाठी उपाययोजना वेळेत पूर्ण करावयाच्या आहेत. पालक गमावलेल्या बालकांचे तातडीने सर्वेक्षण करून अहवाल सादर करावा. त्यासाठी एकात्मिक बालविकास प्रकल्प अधिकारी, तहसीलदार, गटविकास अधिकारी, महापालिकेचे वैद्यकीय अधिकारी, मुख्याधिकाऱ्यांनी सहकार्य करावे. अशा बालकांच्या संपर्कात राहत त्यांची नियमितपणे आरोग्य तपासणी होईल, याची दक्षता घ्यावी. या बालकांना बालसंगोपन योजनेचा लाभ मिळवून द्यावा.

विधवांना मदत, रोजगारही
कोरोना काळात विधवा झालेल्या महिलांना पात्रतेचे निकष तपासून शासनाच्या विविध निराधार योजनांचा लाभ द्यावा. शिवाय त्यांना रोजगार व स्वयंरोजगाराची संधी द्यावी. बालके नातेवाइकांकडे राहत असतील, तर त्यांचा नियमानुसार सांभाळ करण्याबाबत सूचना देणे, दत्तक प्रक्रियेची आवश्यकता कार्यवाहीच्या सूचना देण्यात आल्या.

अशी आहे आकडेवारी

जिल्ह्यात दोन्ही पालक गमावलेली बालके : ९
* सात बालके : १८ वर्षांच्या आतील
* दोन बालके : १८ वर्षांवरील
* एक पालक मृत्यू पावलेली बालके : १९१
* १३४ बालके : १८ वर्षांखालील
* ५२ बालके : १८ वर्षांवरील
* पाच बालके : एक वर्षाखालील

१५३ महिलांनी गमावले कुंकू
जळगाव महापालिकेकडून कोरोनामुळे मृत्यू पावलेल्या ३१९ पालकांची यादी प्राप्त झाली आहे. त्याची पडताळणी करण्याची कार्यवाही सुरू आहे. दवाखान्यात दाखल असलेल्या पालकांची संख्या ११ असून, कोरोना काळात विधवा झालेल्या महिलांची संख्या १५३ असल्याचे जिल्हा महिला व बालविकास अधिकारी परदेशी यांनी सांगितले..