जळगाव : जळगाव ते शिरसोलीच्या दरम्यान दुपारी रेल्वे घसरल्याचा संदेश सर्वत्र पाठविण्यात आल्यानंतर खळबळ उडाली असतांना हे मॉक ड्रील करण्यात आल्याची माहिती रेल्वे प्रशासनाने दिली आहे.

अप कामयानी एक्सप्रेस (०१०७२) जळगाव स्‍टेशनवरून सुटून मुंबईकडे रवाना झाली. जळगाव स्‍टेशन सोडल्‍यानंतर शिरसोली- म्हसावद दरम्यान ट्रेनचे तीन डबे घसरल्याची बातमी समोर आली. एक्‍सप्रेसचे तीन डबे घसरल्‍याने मोठा आवाज झाला. यामुळे परिसरातील ग्रामस्थांनी घटनास्थळी धाव घेतली असून मदतकार्य सुरू करण्यात आले. या भिषण अपघातात किती जणांचा बळी गेला आणि काय नुकसान झाले; याबाबत कोणत्‍याही प्रकारची माहिती नसताना रेल्वेच्या भुसावळ विभागाकडून देखील अपघाताला दुजोरा देण्यात आला आहे. 

एक तासानंतर केले जाहीर
जळगाव ते शिरसोली दरम्‍यान अपघात झाल्याची माहिती समोर आल्यानंतर खळबळ उडाली होती. या अपघाताला रेल्वे प्रशासनाकडून दुजोरा देण्यात आला. तथापि, सुमारे एक तासानंतर हे मॉक ड्रील असल्याची अधिकृत माहिती रेल्वे प्रशासनाने जाहीर केली आहे. सुरवातीला हा अपघात अप लाईन खंबा क्रमांक ४०३/२३ जवळ घडल्‍याचे सांगून उच्च अधिकाऱ्यांनी अपघातस्थळी धाव घेतल्‍याचे देखील जाहीर करण्यात आले होते. सुरवातीला अपघात झाल्‍याचे रेल्वे प्रशासनाकडून दुजोरा देण्यात आला. पण एक तासानंतर कोणत्‍याही प्रकारचा अपघात नसून मॉक ड्रील असल्याचे रेल्वे प्रशासनाकडून जाहीर करण्यात आले.