धानोरा (जळगाव) : धानोरा (ता. चोपडा) परिसरातील अनेक गावात कोरोना संसर्ग झपाट्याने वाढत आहे. या परिस्थितीत सौम्य लक्षणे असलेले होम क्वारनटाईन रुग्ण नियमांचे पालन न करता गावभर मोकाट फिरत असल्याने संसर्गाचा धोका अधिक तीव्र होत आहे. ह्या रुग्णांना गावातील सुज्ञ नागरिक गावात फिरू नका घरीच रहा असे बोलल्यास ते त्यांना अरेरावीची भाषा वापरतात. त्यामुळे ह्या मोकाट फिरणाऱ्या होम क्वारनटाईन रुग्णांना आवरणार तरी कोण असा प्रश्न ग्रामस्थांना पडला आहे.

चोपडा तालुका कोरोनाचा हॉटस्पॉट झाला आहे. तालुक्यात दररोज बाधित रुग्ण संख्या वाढत आहे. तालुक्यातील उपजिल्हा रुग्णालयात बेड कमी असल्याने सौम्य लक्षणे असणाऱ्या रुग्णांना वैद्यकीय अधिकारी घरीच राहून गोळ्या औषधे खा व होम क्वारंटाईन रहा असा सल्ला देत आहेत. मात्र काही होम क्वारंनटाईन रुग्ण दूध, किराणा खरेदीचा बहाणा करून मोकाटपणे बाहेर फिरून कोरोनाचा प्रादुर्भाव वाढवत आहेत. त्यामुळे ग्रामस्थांची डोकेदुखी वाढली असून, भीतीचे वातावरण निर्माण झाले आहे.

मोकाट फिरणाऱ्या रुग्णांवर चाप लावा

होम क्वारंटाईन रुग्णांनी घरीच विलग राहून उपचार घेणे बंधनकारक आहे. मात्र होम क्वारंटाईन असलेले व कोविड उपचार केंद्रातून सोडलेले रुग्ण फिरत असताना दिसतात. होम क्वारंटाईन रुग्ण किंवा कोविड उपचार केंद्रात उपचार घेऊन आलेल्या रुग्णांनी पुढील काही दिवस घरी विलगिकरण रहाणे आवश्यक आहे. पोलिसांनी व ग्रामपंचायत प्रशासने मोकाट फिरणाऱ्या रुग्णांना चाप लावावी अशी मागणी सुज्ञ नागरिकांमधून केली जात आहे.

रुग्णामुळे संसर्गाचा धोका वाढला

कोरोना संसर्गाची लाट तीव्र होत असताना होम क्वारंटाईन असलेले रुग्ण मोकाट फिरत असल्याने ग्रामस्थांमध्ये भीतीचे वातावरण निर्माण झाले आहे. या रुग्णामुळे संसर्गाचा धोका वाढला आहे. वैद्यकीय अधिकारी व कर्मचारी रात्र दिवस कोरोना रुग्णांसाठी झटत आहेत. मात्र कोरोना संसर्ग झालेले रुग्ण विनाकारण फिरत असून संसर्ग वाढवत आहे.

सहकार्याची अपेक्षा

धानोरा प्राथमिक आरोग्य केंद्रा अंतर्गत १८ गावे व वाड्यावस्त्यांचा समावेश आहे. आरोग्य केंद्रात दररोज रॅपिड टेस्ट करणे सुरूच आहे. यादरम्यान सौम्य लक्षणे असलेले रुग्णांना होम क्वारंटाईन केले जाते. आरोग्य विभागात कोरोना महामारीमुळे रात्रंदिवस सेवा देत आहेत. त्यांना क्वारंटाईन रुग्ण बाहेर फिरत आहे की घरीच विलगिकरण आहे याबाबत लक्ष देणे शक्य होत नाही. त्यामुळे संबंधित रुग्णांनी आरोग्य विभागास सहकार्य करणेही अपेक्षित असल्याचे वैद्यकीय अधिकारी डॉ.कवडीवाले यांनी सकाळशी बोलतांना सांगितले.

कोविड उपचार केंद्रातून उपचार घेऊन आलेल्या रुग्णांनी पुढील १४ दिवस घरी विलगीकरण रहाणे आवश्यक आहे. तसेच होम क्वारनटाईन रुग्णांनी घरीच विलग राहून उपचार घेणे बंधनकारक आहे. मात्र हे रुग्ण फिरत आहेत या रुग्णामुळे संसर्गाचा धोका वाढला आहे. वैद्यकीय अधिकारी व कर्मचारी रात्र दिवस कोरोना रुग्णांसाठी झटत आहेत. यासाठी नागरिकांनी आरोग्य विभागास सहकार्य करणे गरजेचे आहे.

-डॉ. उमेश कवडीवाले, वैद्यकीय अधिकारी, प्राथमिक आरोग्य केंद्र, धानोरा

गावातील होम क्वारंटाइन असलेले कोरोना संसर्ग झालेले रुग्ण विनाकारण गावभर फिरून संसर्ग वाढवत असतील तर बाधित रुग्णांची माहिती ग्रामस्थांनी ग्रामपंचायत प्रशासनाला कळवावी आम्ही त्यांच्यावर नक्कीच कायदेशीर कारवाई करु.

- विजय चौधरी, उपसरपंच धानोरा.

संपादन- राजेश सोनवणे