मेहुणबारे ः भऊर (ता.चाळीसगाव) येथील शिवारात रानडुकारांचा गेल्या काही दिवसापासून हैदोस सुरु आहे. भऊर येथील शेतकरी दीपक अंकुश पाटील यांच्या एका महीन्यात काढणीवर आलेल्या दोन एकर मका क्षेत्रातील एक एकरवरील मका पिकाचे रानडुकरांनी  नुकसान केले. त्यामुळे या शेतकऱ्यांंला मोठा फटका बसला आहे. या झालेल्या नुकसानीचा पंचनामा करून नुकसान भरपाई द्यावी व रानडुकारांचा बंदोबस्त करावा अशी मागणी दीपक पाटील यांनी वन विभागाकडे केली आहे.
  
गत वर्षी अति पावसामुळे खरीप हंगाम हाताचा गेला होता. त्यामुळे यंदा भऊर (ता.चाळीसगाव) शिवारात शेतकऱ्यांची रब्बीवरच मदार आहे. चांगल्या पावसामुळे सध्या रब्बीचे पिके बहरात असतांनाच गेल्या काही दिवसापासून परीसरात रानडुकरांनी मोठा हैदोस घातला आहे. या रानडुकरांच्या उपद्रवामुळे शेतकऱ्यांना रात्रंदिवस शेतात पिकांचे रक्षण करण्याची वेळ आली आहे. भऊर शिवारात दीपक पाटील यांच्या गट नं.7मध्ये मक्याची लागवड केली आहे. सध्या हा मका ऐन बहरात असतांना रविवारी रात्री रानडुकरांनी सुमारे एक एकरवरील मका पिकांची नासधूस केली. त्यामुळे या शेतकऱ्याला लाखो रुपयाचा फटका बसला आहे.
    
या झालेल्या नुकसानीचा वन विभागाने तातडीने पंचनामा करून नुकसान भरपाई द्यावी अशी मागणी दीपक पाटील यांनी वन विभागाकडे केली आहे.दरम्यान यापूर्वी रान डुकरांनी काही शेतकऱ्यांच्या शेती पिकांचे अतोनात नुकसान केले आहे. या रानडुकरांकडून शेतकऱ्यांच्या जीवीतासही धोका निर्माण झाला आहे.सतत पिकांचे नुकसान करणाऱ्या रानडुकरांचा बंदोबस्त करावा अशी मागणी शेतकऱ्यांकडून वारंवार होवून देखील वनविभागाकडून दुर्लक्ष केले जात असल्याने शेतकरी हतबल झाले आहेत.

संपादन- भूषण श्रीखंडे