यावल : नगरपालिकेच्या रिक्त असलेल्या नगराध्यक्षपदाच्या नियुक्तीसाठी जिल्हाधिकारी अभिजित राऊत यांनी निवडणूक कार्यक्रम जाहीर केला असून 14 जुलैस अनुसूचित जमाती महिला राखीव असलेल्या नगराध्यक्षपदासाठी निवडणूक होत आहे. नगराध्यक्षपदाच्या निवडीसाठी विशेष सभेला पीठासीन अधिकारी म्हणून प्रांताधिकारी डॉ. अजित थोरबोले असतील. विशेष म्हणजे महाआघाडी शासनाने लोकनियुक्त पद्धतीची नगराध्यक्ष व सरपंच निवड रद्दबातल केल्यामुळे नगराध्यक्षपद निवडीसाठी नगरसेवकांमधून निवड होईल. 

पालिकेत अनुसूचित जमाती महिला म्हणून प्रभाग क्रमांक 3 मधून निवडून आलेल्या नौशाद मुबारक तडवी या एकमेव अनुसूचित जमाती महिला सदस्य असल्यामुळे नगराध्यक्षपदी श्रीमती तडवी यांची बिनविरोध निवड होऊन त्या विजयी होण्याची औपचारिकता बाकी आहे. येथील शिवसेनेच्या लोकनियुक्त नगराध्यक्ष सुरेखा कोळी यांनी अनुसूचित जमातीचे वैध जात प्रमाणपत्र विहित मुदतीत सादर न केल्यामुळे पालिकेचे मुख्याधिकारी यांनी तसा अहवाल जिल्हाधिकारी यांना सादर केला होता. दरम्यान याच मुद्यावरून श्रीमती कोळी यांचेविरुद्ध माजी नगराध्यक्ष तथा विद्यमान नगरसेवक अतुल पाटील यांनी जिल्हाधिकारी जळगाव यांचेकडे तक्रार अर्ज दिला होता. या अर्जाची दखल घेत तत्कालीन जिल्हाधिकारी अविनाश ढाकणे यांनी 28 नोव्हेंबर 2019ला लोकनियुक्त नगराध्यक्ष सुरेखा कोळी यांना पदावरून पदच्युत करीत अपात्र घोषित केले होते. दरम्यान, श्रीमती कोळी यांनी जिल्हाधिकाऱ्यांच्या निर्णयाविरोधात राज्याच्या नगरविकास विभागाकडे अपील दाखल केले होते. मात्र नगरविकास विभागानेही त्यांचे अपील फेटाळून नगराध्यक्षपद अपात्र केले होते. 
 
निवडीचा कार्यक्रम असा 
अर्ज दाखल करणे : 6 ते 7 जुलै सकाळी 11ते दुपारी 2 पर्यंत 
अर्जाची छाननी :7 जुलै दुपारी 2 वाजेनंतर 
अपील दाखल करणे : 8 ते 10 जुलै सायंकाळी 5 वाजेपर्यंत 
वैध अर्ज यादी प्रसिद्ध : 10 जुलै सायंकाळी 5 वाजेनंतर 
उमेदवारी मागे घेणे : 13 जुलै दुपारी 4 वाजेपर्यंत 
निवडणूक सभा : 14 जुलै सकाळी 11 वाजता