Jalgaon Rohit Pawar : शहरात मंगळवारी (ता. ५) उन्हाचे प्रमाण व तापमानही जास्त होते. शरद पवार यांची सभा सुरू असतानाही मंडपाच्या डी झोनमध्ये ऊन आले होते. त्यावेळी नागरिक सावलीसाठी पुढे सरकत असल्याने एकच गोंधळ उडाला.

परंतु, हा गोंधळ शांत करण्यासाठी शरद पवारांचे नातू आमदार रोहित पवार व्यासपीठावरून उतरून थेट उन्हात जनतेत जावून बसले अन्‌ गोंधळ शांत झाला. (MLA Rohit Pawar seats with public in sharad pawar meeting jalgaon news)

राष्ट्रवादी कॉंग्रेसचे नेते शरद पवार यांची मंगळवारी जळगावात जाहीर सभा झाली. जळगाव जिल्ह्यात पावसाने दडी मारली असून, रोज उन व तापमानही वाढत आहे. जनता मात्र पावसाची प्रतिक्षा करीत आहे. पाऊस येईल या अपेक्षेने सभेच्या ठिकाणी व्यासपीठ, तसेच जनतेसाठी वॉटरप्रूफ तंबू उभारण्यात आला होता.

मात्र, व्यासपीठ आणि तंबूत मधली डी झोनची जागा मोकळीच होती. त्या ठिकाणी वरच्या भागात कोणतेही आच्छादन नव्हते.

हेही वाचा : Credit Card फसवणूक....काय घ्याल काळजी?

दुपारी दोनला सभा सुरू झाल्यानंतर ऊन वाढत गेले. साडेतीनच्या सुमारास अधिकच उन वाढले. गर्दीही वाढली होती. त्यावेळी काही नागरिक उन्हापासून संरक्षण करण्यासाठी डी झोनमध्ये सावली शोधत त्या ठिकाणी जागा मिळविण्याचा प्रयत्न करू लागले.

पोलीसांनी विरोध केला, परंतु प्रदेशाध्यक्ष जयंत पाटील यांनी पोलीसांना जागा देण्यास सांगितले. त्यावेळी एकच गोंधळ उडाला. हा प्रकार पाहून आमदार रोहित पवार व्यासपीठावरून खाली आले. उन्हापासून संरक्षण करण्यासाठी डोक्यावर मुंडासे बांधून ते जनतेत बसले. त्यानंतर नागरिकही शांत झाले अन्‌ सभा शांततेत झाली. सभा संपेपर्यंत आमदार पवार जनतेतच बसून होते.