मुक्ताईनगर : मुंढोळदे (खडकाचे) (ता. मुक्ताईनगर) ते सुलवाडी- ऐनपूर (ता. रावेर) या ठिकाणावरून दोन तालुक्यांना जोडणाऱ्या रस्त्यावर तापी नदीवर मुंढोळदे (खडकाचे) गावाजवळ मोठ्या पुलाच्या बांधकामासाठी सुमारे १७५ कोटी रूपये निधीस अर्थसंकल्पात मंजुरी मिळालेली असून, यामुळे माझ्या शेतकरी राजा व जनतेला दूरचे अंतर सुलभ होईल व शेतीमालाची फरफट थांबणार आहे, अशी माहिती आमदार चंद्रकांत पाटील यांनी दिली.

मुक्ताईनगर मतदार संघातील रावेर आणि मुक्ताईनगर तालुक्यात केळी उत्पादक शेतकरी मोठ्या प्रमाणावर असल्याने येथे होत असलेली केळी वाहतूक लांब पल्ल्याने करावी लागते. त्यामुळे शेतकऱ्यांना वाहतुकीचा मोठा भुर्दंड सोसावा लागतो. परंतु हतनूर धरणाच्या बॅक वॉटरमुळे तापी नदीपात्रात येथे मोठ्या प्रमाणावर पाणी साठलेले असते.

तसेच या ठिकाणी पुलाचे काम मंजूर झाल्यास मुक्ताईनगर व रावेर तालुक्याला जोडणारा व कमी अंतरांचा महत्त्वाचा प्रकल्प ठरणार आहे, अशी मागणी आमदार चंद्रकांत पाटील यांनी शासन दरबारी लावून धरलेली होती. यासाठी त्यांचा सतत पाठपुरावा सुरू होता, तर माजी मंत्री एकनाथ खडसे यांनी आमदार पाटील यांना डिवचत पूल मंजूर केल्यास सत्कार करू, अशी वल्गना केली होती.

रोहिणी खडसे यांनी देखील भाषणाच्या ओघात सत्कार करण्याचे म्हटले होते. याच अनुषंगाने आता पूल मंजूर झालेला असून दोघे पिता पुत्री आमदार चंद्रकांत पाटील यांचा सत्कार करणार का? असा सवाल सोशल मीडियावरून उपस्थित केला आहे.

चंद्रकांत पाटील यांचा पाठपुरावा

दरम्यान, आमदार चंद्रकांत पाटील हे शिंदे- फडणवीस सरकारमधील बाहुबली आमदार ठरलेले असून, सरकार स्थापन झाल्यापासून कोट्यवधींचा निधी मतदारसंघासाठी उपलब्ध होत आहे.

त्यातच वारकरी संप्रदायासाठी श्रद्धेचा विषय असलेल्या संत मुक्ताई मंदिरासाठी नुकतीच त्यांनी १५ कोटी निधी, मागील आठवड्यात मुक्ताईनगर, सावदा व बोदवड पाणीपुरवठा योजनांसाठी कोट्यवधी निधीसह मंजुरी आणली आहे.

सर्वांत मोठी उपलब्ध म्हणजे एमआयडीसीची असून, ६२५ एकर जमीन क्षेत्रावर मंजुरी व पहिला टप्पा १०० एकर जमीन क्षेत्र संपादित करण्याचे मागील महिन्यात मंजुरी घेतलेली आहे. दरम्यान, सुलवाडी ते मुंढोळदे (खडकाचे) हा पूल मंजूर झाल्याने शेतकऱ्यांना शेती माल वाहतुकीसह दोन तालुके जवळ येणार आहे.