जळगाव : परिवार संवाद यात्रेला निघालेल्या राष्ट्रवादीच्या प्रदेशाध्यक्ष जयंत पाटलांनी आज यावल तालुक्यातील भालोद गाव गाठत स्व. हरिभाऊ जावळेंच्या कुटुंबियांची सांत्वनपर भेट घेतली. शेती आणि शेतकऱ्यांसाठी नेहमीच आग्रही असलेल्या हरिभाऊंबद्दल पाटलांनी भावनाही व्यक्त केल्या. 

आवश्य वाचा- लोकसेवेत व्यस्त राहिलात तर सत्तेतही टिकून राहता येते 

जयंत पाटील राज्यात परिवार संवाद यात्रेवर असून ते सध्या जळगाव जिल्ह्याच्या दौऱ्यावर आहेत. शुक्रवारी फैजपूर येथील कार्यक्रमानंतर त्यांनी माजी मंत्री एकनाथराव खडसेंसह भालोद गावी जाऊन हरिभाऊंच्या कटुंबियांची भेट घेतली. हरिभाऊंच्या पत्नी श्रीमती कल्पना, पुत्र अमोल यांच्याशी त्यांनी चर्चा केली. हरिभाऊंच्या विधानसभेतील स्मृतींना उजाळा देत शेती व शेतकऱ्यांसाठी हरिभाऊंनी नेहमीच महत्त्वाचे मुद्दे सभागृहात मांडल्याचे त्यांनी सांगितले. या वेळी आमदार अनिल भाईदास पाटील, माजी आमदार मनीष जैन, राष्ट्रवादीचे जिल्हाध्यक्ष ॲड. रवींद्र पाटील, जळगाव महानगराध्यक्ष अभिषेक पाटील आदी उपस्थित होते. 

आवर्जून वाचा- शौर्य गाजवूनही शासनाकडून बेदखल; अजून ही कायम नोकरीच्या शोधात


शेळगाव बॅरेज, मेगारिचार्ज स्कीम 
यावलसह भुसावळ व चोपडा तालुक्यासाठी वरदान ठरणाऱ्या तापी नदीवरील शेळगाव बॅरेज व मेगा रिचार्ज स्कीम हे हरिभाऊंचे स्वप्न होते. त्यासाठी त्यांनी सातत्याने पाठपुरावा केल्याचे अमोल जावळेंनी जयंत पाटील यांच्या निदर्शनास आणून दिले. जलसंपदा मंत्री म्हणून या कामात लक्ष घालून जिल्ह्यासाठी वरदान ठरणाऱ्या या प्रकल्पांचे काम मार्गी लावावे, अशी अपेक्षाही उपस्थित कार्यकर्त्यांनी व्यक्त केली. 

संपादन- भूषण श्रीखंडे