No Vehicle Day: राष्ट्रीय शुध्द हवा कार्यक्रम व माझी वसुंधरा ४.० अंतर्गत ‘एक दिवस आपल्या शहरासाठी’ उपक्रम राबवण्यात येणार आहे. त्याअनुषंगाने जळगाव महापालिकेतर्फे दर महिन्याच्या पहिल्या बुधवारी शहरात ‘नो व्हेईकल डे’ पाळण्यात येईल. (No Vehicle Day on first Wednesday of every month by Municipal Corporation jalgaon news)

महापालिकेचे कर्मचारी त्यात सहभागी होणार आहेत. परंतु सरकारी, खासगी कार्यालयातील कर्मचाऱ्यांनी त्यात सहभागी व्हावे असे पत्र देण्यात येणार असल्याची माहिती महापालिकेच्या उपायुक्त अश्विनी भोसले-गायकवाड यांनी दिली.

महापालिकेत पत्रकारांशी बोलताना त्या म्हणाल्या, की सुंदर शहर, हिरवेगार शहर, प्रदूषण विरहित शहर करण्यासाठी प्रयत्न करण्यात येणार आहे.

त्यासाठी दर महिन्याच्या पहिल्या बुधवारी ‘नो व्हेईकल डे’ राबविण्यात येईल.

कार्यालयात येणाऱ्या कर्मचाऱ्यांनी त्यादिवशी आपले प्रदूषण न करणारे वाहन अथवा सार्वजनिक वाहन वापरावे. कर्मचाऱ्यांनी सायकलवर अथवा पायी कार्यालयात यावे. ज्यांच्याकडे बॅटरीवर चालणारे वाहन असतील, त्यांनी ते घेऊन यावे. त्यामुळे प्रदूषण कमी होण्यास मदत होईल.