फैजपूर : शहरातून गेलेल्या अंकलेश्र्वर -बऱ्हाणपूर महामार्गावर सूचना फलक नसल्याने येथील पालिकेच्या महात्मा गांधी बहुउद्देशीय सभागृहासमोर दुभाजकावर वाहने आदळली जाऊन अपघातांची मालिका सुरू होती.

या विषयी ‘सकाळ’ने वृत्त प्रकाशित करताच पालिकेतर्फे दुभाजकाच्या दर्शनी भागात रेडियमचे दिशादर्शक फलक लावण्यात आला आहे. (Notice board on Ankleshwar Barhanpur highway jalgaon news)

शहरातून गेलेल्या अंकलेश्वर -बऱ्हाणपूर या राष्ट्रीय महामार्गावरून दिवसरात्र जड वाहनांची मोठ्या प्रमाणात वर्दळ सुरू असते.

याच पार्श्वभूमीवर शहरातून गेलेल्या या महामार्गावर शहरातील यावल रस्त्यावरील कृषी उत्पन्न बाजार समितीच्या व्यापारी संकुलापासून ते सुभाष चौकापर्यंत गेल्या आठ, दहा वर्षांपूर्वी दुभाजक करण्यात आले आहे.

त्या वेळी दुभाजकांच्या दर्शनी भागावर दिशादर्शक फलक व काळे-पिवळे पट्टेही आखण्यात आले.

परंतु हे पट्टे अस्पष्ट झाल्याने रात्रीच्या सुमारास दुभाजक दिसत नसल्याने या ठिकाणी अनेक छोटे-मोठे अपघात होत आहेत.

या विषयी ‘सकाळ’ ने सचित्र वृत्त प्रकाशित केला. त्याची दखल घेत पालिका प्रशासनाने या ठिकाणी नुकतेच रेडियमचे दिशादर्शक फलक लावले आहे.

दरम्यान, आता सुभाष चौक ते छत्री चौक व बसस्थानकमार्गे बाजार समिती संकुलापर्यंत दिशादर्शक फलक लावणे गरजेचे आहे.

तसेच दुभाजकांना काळे-पिवळे रंगाचे पट्टे मारून परिसराची साफसफाई करण्याची मागणी होत आहे.

दरम्यान, दुभाजकाच्या दर्शनी भागात एलएडी दिव्याचा खांब व रेडियमचे दिशादर्शक फलक बसविण्याच्या मागणीचे निवेदन येथील एम. मुसा असंघटित गवंडी कामगार व श्रमिक कोहेनूर कामगार संघटनेतर्फे प्रशासक तथा प्रांताधिकारी व पालिकेला देण्यात आले आहे.