Daya Pawar Memorial Award : साहित्य, सामाजिक आणि सांस्कृतिक क्षेत्रात अत्यंत प्रतिष्ठेचा म्हणून ओळखला जाणारा पद्मश्री दया पवार स्मृती पुरस्कार जाहीर झाला असून, यंदाच्या पुरस्कारांसाठी ज्येष्ठ साहित्यिक आणि भाषातज्ज्ञ डॉ. गणेश देवी आणि सामाजिक कार्यकर्ते व गुजरातचे प्रभावी नेते, मानवी हक्क कार्यकर्ता आणि आमदार जिग्नेश मेवाणी यांची निवड झाली आहे. (Padma Shri Daya Pawar Memorial Award announced jalgaon news)

सोबतच ‘काळ्या निळ्या रेषा’ या आत्मचरित्रात्मक पुस्तकासाठी चित्रकार राजू बाविस्कर यांना यंदाचा ग्रंथाली पुरस्कृत ‘बलुतं’ पुरस्कार जाहीर झाला आहे. दया पवार स्मृती पुरस्काराचे यंदाचे हे रौप्यमहोत्सवी वर्ष आहे, हे विशेष.

यशवंतराव चव्हाण प्रतिष्ठान, मुंबई यांच्या सहकार्याने २७ ऑक्टोबरला सायंकाळी सहाला यशवंतराव चव्हाण प्रतिष्ठानच्या ‘रंगस्वर’ सभागृहात ज्येष्ठ संपादक आणि खासदार कुमार केतकर यांच्या अध्यक्षतेखाली वितरण सोहळा होईल.

सोहळ्यादरम्यान कवी-अभिनेता अक्षय शिंपी यांचे कथाकथन आणि ‘झुंड’फेम विपीन तातड आणि माही जी. या रॅप क्षेत्रात सध्या धुमाकूळ घालणाऱ्या कलाकारांचा रॅप सादर होणार आहे.

पत्रकार अलका धुपकर सूत्रसंचालन करतील. यंदाचा हा पंचविसावा पुरस्कार सोहळा असून, प्रत्येकी दहा हजार रुपये रोख आणि सन्मानचिन्ह असे या पुरस्काराचे स्वरूप आहे. कार्यक्रम सर्वांसाठी खुला असून, दया पवारांच्या चाहत्यांनी कार्यक्रमाला उपस्थित राहावे, असे आवाहन दया पवार प्रतिष्ठानच्या अध्यक्षा हिरा दया पवार यांनी केले आहे.