जळगाव : जिल्ह्यात २०२१-२२ करिता प्रधानमंत्री पीकविमा योजना आयआयसी लोमबार्ड जनरल इन्शुरन्स कंपनीतर्फे अधिसूचित क्षेत्रात राबविली होती. या योजनेत शेतकरी हिस्सा म्हणून २७ कोटी ४८ लाख विमा कंपनीकडे भरले होते. यापूर्वी खरीप पिकांसाठी मीड सिजन व स्थानिक आपत्तीसाठी विमा कंपनीकडून ६४ कोटी ९५ हजारांची रक्‍कम ९३ हजार ९८१ शेतकऱ्यांच्या बॅंक खात्यात जमा करण्यात आली असल्याची माहिती जिल्हा अधीक्षक कृषी अधिकारी संभाजी ठाकूर यांनी दिली.

या योजनेत उत्पन्नावर आधारित अंतिम नुकसानभरपाईची रक्‍कम ५३ कोटी ८० लाख पालकमंत्री गुलाबराव पाटील यांनी शासन स्तरावर प्रयत्न करून मंजूर केली आहे. या र‍कमेपैकी कापूस वगळता इतर खरीप पिकांची नुकसानभरपाई नऊ कोटी ६९ लाख रकमेचे वाटप विमा कंपनीकडून करण्यात येत आहे. उर्वरित कापूस पिकाची देय असलेली नुकसानभरपाई रक्‍कम ५२ कोटी १९ लाख रुपये ४८ हजार १०७ शेतकऱ्यांना त्वरित वाटप करण्याचे आदेश पालकमंत्री पाटील यांनी दिले आहेत, असे जिल्हा अधीक्षक कृषी अधिकारी ठाकूर यांनी सांगितले.