अमळनेर (जि. जळगाव) : रेल्वेस्थानकावर विनापरवाना चणे, फुटाणे विक्री करणाऱ्याला हटकल्याचा राग आल्याने त्याने रेल्वे सुरक्षा बलाच्या कर्मचाऱ्यांना मारहाण केली. दहशत माजविणाऱ्या या तरुणाला पोलिसांनी चांगला धडा शिकवत त्याची रेल्वेस्थानक परिसरातून धिंड काढून नागरिकांच्या मनातील भीती दूर केली.

नासिर शेख आमीर शेख याने रेल्वेस्थानकावर व्यवसाय करू देत नाही म्हणत आरपीएफ राजकुमार महाराम जाटव व देवेंद्र जयलाल नेने यांना शिवीगाळ करून काठ्यांनी मारहाण केली. त्यावेळी वरिष्ठ अधिकारी तेथे आले असता संशयित पळून गेले. या प्रकरणी अमळनेर पोलिस ठाण्यात सरकारी कामात अडथळा आणल्याचा गुन्हा दाखल करण्यात आला होता. पोलिस निरीक्षक जयपाल हिरे यांच्या मार्गदर्शनाखाली उपनिरीक्षक अनिल भुसारे, श्रीराम पाटील, अमोल पाटील, मधुकर पाटील यांनी संशयित नासिर शेख याला पकडून त्याने ज्या ज्या ठिकाणी दादागिरी करून रेल्वे पोलिसांना त्रास देण्याचा प्रयत्न केला होता. त्या ठिकाणी नेऊन त्याची धिंड काढली.