Jalgaon Bribe Crime : बांधकाम मटेरियलची वाहतूक करणाऱ्या व्यावसायिकाचा डंपर अडवून ३० हजारांची लाच मागून ती खासगी पंटरच्या माध्यमातून स्वीकारताना येथील पोलिस ठाण्यातील हवालदारासह खासगी पंटरला धुळे येथील लाचलुचपत प्रतिबंधक विभागाने रंगेहाथ पकडले.

हवालदार घनश्याम अशोक पवार व खासगी पंटर इम्रानखान शब्बीरखान पठाण असे अटकेतील लाचखोरांची नावे आहेत. (Punter arrested along with bribe taking constable from Amalner jalgaon crime news)

तक्रारदार हे अमळनेर शहरातील रहिवासी असून त्यांचा बांधकाम मटेरियलचा व्यवसाय आहे. येथील हवालदार घनश्याम पवार यांनी ७ जानेवारीला तक्रारदाराचा डंपर अडवत त्यांच्याकडे पोलिस निरीक्षक विजय शिंदे व स्वतःसाठी दरमहा हप्ता म्हणून ३० हजारांची लाच मागितली होती.

याबाबतची तक्रार तक्रारदाराने धुळे लाचलुचपत प्रतिबंधक विभागाकडे दूरध्वनीवरून केली. त्यानुसार, लाचलुचपत विभागाच्या पथकाने मंगळवारी (ता. ९) लाचेबाबत पडताळणी केल्यानंतर हवालदार पवार यांनी ३० हजारांची लाच मागणी केल्याचे निष्पन्न झाल्याने सापळा रचला.

खासगी पंटर इम्रान खान याच्याकडे लाचेची रक्कम देण्याचे घनश्याम पवार यांना सांगितल्यानंतर सुरवातीला त्याला व नंतर हवालदार घनश्याम पवार यांना पथकाने अटक केली.

यांनी केली यशस्वी कारवाई

ही कारवाई धुळे लाचलुचपत प्रतिबंधक विभागाचे पोलिस उपअधीक्षक अभिषेक पाटील यांच्या मार्गदर्शनाखाली पोलिस निरीक्षक हेमंत बेंडाळे, पोलिस निरीक्षक रूपाली खांडवी, राजन कदम, मुकेश अहिरे, प्रशांत बागूल, मकरंद पाटील, रामदास बारेला, संतोष पावरा, प्रवीण मोरे, प्रवीण पाटील, सुधीर मोरे, जगदीश बडगुजर यांच्या पथकाने केली.