जळगाव : शहरातील रस्त्याच्या कामाच्या गुणवत्तेत कोणतीही तडजोड केली जाणार नाही, असा इशारा जिल्हाधिकारी अभिजित राऊत यांनी दिला. त्यांनी शनिवारी (ता. २२) महापालिकेचे आयुक्त डॉ. सतीश कुळकर्णी यांच्यासमवेत अचानकपणे कामांची पाहणी केली.

जळगाव शहरातील रस्त्यांची दुरवस्था झाली होती, शासनाकडून निधी प्राप्त होताच शहरातील प्रमुख सात रस्त्यांची कामे सुरूही करण्यात आली आहेत. स्वातंत्र्य चौक ते पांडे डेअरीपर्यंत रस्त्याचे काम सुरू आहे. आयुक्त डॉ. सतीश कुळकणी व जिल्हाधिकारी अभिजित राऊत यांनी शनिवारी दुपारी अचानक या कामाची प्रत्यक्ष पाहणी केली. अचानक केलेल्या पाहणीमुळे अधिकाऱ्यांसह कर्मचांऱ्याचीही ताराबंळ उडाली. मक्तेदार अभिषेक पाटील उपस्थित होते. या वेळी त्यांना काही सूचनाही करण्यात आल्या. कामाच्या गुणवत्तेत कोणतीही तडजोड केली जाणार नाही, रस्त्याची कामे टिकाऊ होणे आवश्‍यक आहे, या कामांचे ऑडिट केले जाणार आहे. काम योग्य पद्धतीने न झाल्यास संबधितावर कारवाई करण्यात येईल असा ईशाराही जिल्हाधिकारी अभिजीत राऊत यांनी दिला आहे.