Jalgaon Flood News Update : सध्या राज्यातील विविध भागांत मुसळधार पाऊस कोसळत असून अनेक ठिकाणी पुरामुळे नागरिक अडकले आहेत. काल यवतमाळ, अकोला, बुलढाणा जिल्ह्यातील अनेक नद्या, नाल्यांना पूर आला असून शेतीचे मोठे नुकसान झाले आहे. तर पुरात अडकलेल्या नागरिकांची सुटका करण्यासाठी हवाई दलाच्या हेलिकॉप्टरची मदत घेण्यात आली होती.

सध्या जळगाव जिल्ह्यातील रावेत तालुक्यातील मांगी येथील एका तरूणाचा व्हिडिओ व्हायरल झाला आहे. त्यामध्ये तो शॉर्टकट मार्गाने घरी जाण्यासाठी थेट पुराच्या पाण्यात उडी मारत आहे. पुराच्या पाण्यात वाहून गेल्यानंतर पुढे तो घरी सुखरूप पोहोचतो असं सांगत आहे. तिथे उपस्थित असलेल्या नागरिकांनी हा व्हिडिओ शूट केला असून हा थरारक व्हिडिओ सोशल मीडियावर चांगलाच व्हायरल झाला आहे.

अधिक माहितीनुसार, गणेश पुंडलिक कोडे असं या तरूणाचं नाव असून "मला शॉर्टकटने घरी जायचं होतं म्हणून मी या पाण्यात उडी मारली" असं तो सांगत आहे. पण पुराच्या पाण्यात स्टंट करणे अनेकदा आपल्या जीवावर बेतू शकते. तर पुराच्या पाण्यात वाहून गेल्याच्या अनेक घटना आपण पाहिल्या असतील.

व्हायरल होत असलेल्या या व्हिडिओवर अनेकांनी मजेशीर कमेंट केल्या आहेत. "यमराज सुट्टी वर होते वाटते, गणेश भाऊ तर शॉर्ट कट मारून घरी गेला, पण तुम्हीं काळजी घ्या रेल्वे यायच्या आत तिथून निघा नाहींतर तुम्हाला पण गणेश भाऊंच्या मागे जावं लागले, याला म्हणते काम" अशा मजेशीर कमेंट नेटकऱ्यांनी केल्या असून अनेकांनी हा व्हिडिओ शेअर केला आहे.