भुसावळ : कंडारी येथे तापी नदीपात्रात अवैधरित्या वाळू आणि माती उत्खनन केले जात आहे. या ठिकाणी कारवाईस गेलेल्या तलाठी व एक महिला अधिकारी व कोतवाल यांना माफियांकडून ठार मारण्याची धमकी दिल्याने खळबळ उडाली आहे.

कंडारी येथील तापी नदीपात्रात अवैधरित्या वाळू, डबर आणि माती उत्खनन केले जाते. याची माहिती मिळाली असता कारवाई करण्यासाठी गेलेल्या महसूल विभागाच्या पथकास काहींनी जीवे ठार मारण्याची धमकी दिली आहे. भीतीपोटी या कर्मचाऱ्यांनी कुठल्याही प्रकारची तक्रार दाखल केली नसल्याची चर्चा आहे. (Sand mafia threatens to kill Talathi Kotwal Jalgaon News)

हेही वाचा : देशाचे नवे पर्यायी चलन ‘डिजिटल रुपी’

अलीकडच्या काळात तालुक्‍यामध्ये वाढलेली बेरोजगारी लक्षात घेता अनेक तरुणांनी कमी काळात जास्त उत्पन्नाची संधी म्हणून अवैध धंद्यांचा आसरा घेतला. यामध्ये बेरोजगार असलेल्या अनेक तरुणांनी सहभाग घेतला. या अवैध व्यवसायांना अप्रत्यक्षरीत्या पोलिसांचा प्रतिसाद मिळाल्यामुळे त्यांना अधिकच संधी मिळत गेली. त्यामध्ये गुटखा, वाळू, दारू या गोष्टींचा तालुक्‍यात प्रादुर्भाव वाढत गेला.

अशा व्यवसायांवर मुळापासून कारवाई करण्याची गरज आहे; अन्यथा शासकीय कर्मचाऱ्यांना धाक दाखविण्याचा प्रयत्न करणाऱ्या वाळूमाफिया भविष्यात पोलिसांवरही आपला धाक दाखवण्यास कमी पडणार नाही.