चोपडा (जि. जळगाव) : तब्बल दोन वर्षांपासून कोरोना (Corona) काळात बहुसंख्य विद्यार्थी (Students) वेगवेगळ्या कारणांनी ऑनलाइन अध्ययनाच्या (Online education) प्रक्रियेपासून दूर होते. त्यांच्यातील क्षमता विकसित होण्याच्या दृष्टीने शहरातील कस्तुरबा माध्यमिक विद्यालयात पाचवी ते आठवीच्या विद्यार्थ्यांचा उन्हाळी सुटीतील वर्ग नुकताच घेण्यात आला. शाळेच्या या उपक्रमाला विद्यार्थ्यांसह पालकांची उत्स्फुर्त प्रतिसाद मिळाला.

विद्यार्थ्यांच्या शारीरिक, बौद्धिक स्तरांवरील क्षमता आणि कौशल्ये विकसित करण्यासाठी पालकांच्या अनुमतीने कस्तुरबा माध्यमिक विद्यालयात २३ एप्रिल ते १४ मे अशा २१ दिवसांचा विशेष शैक्षणिक उपक्रम राबविण्यात आला. या नावीण्यपूर्ण उपक्रमासंदर्भात मुख्याध्यापक एच. बी. मोरे यांनी वार्षिक परीक्षेअगोदर पालकांची सहविचार सभा घेऊन त्यात माहिती दिली होती. अभ्यासात मागे असलेल्या विद्यार्थ्यांची प्रगती करून घेण्यासह त्यांना मुलभूत क्रिया समजावून सांगणे तसेच मराठी, इंग्रजी व गणित विषयाचे मार्गदर्शन विद्यार्थ्यांना करण्यात आले. पालकांच्या संमतीने घेण्यात आलेल्या या वर्गात प्रगत व अप्रगत असे विद्यार्थ्यांचे दोन गट करण्यात आले होते. प्राथमिक स्तरावरील विद्यार्थ्यांना लेखन, वाचनासह गणिते सोडवण्यासंदर्भात शिक्षकांनी मार्गदर्शन केले. या वर्गाचा समारोप झाल्यानंतर विद्यार्थ्यांची झालेली प्रगती पाहून पालकांनी समाधान व्यक्त करुन शाळेच्या या उपक्रमाचे कौतुक केले.