जळगाव : खेडी बुद्रुक (ता. जळगाव) येथील ज्येष्ठ पत्रकाराचा मोबाईल रिक्षा प्रवासादरम्यान तीन भामट्यांनी लांबविला. काळुंखे यांनी दिलेल्या तक्रारीवरून एमआयडीसी पोलिसांत गुन्हा दाखल झाला.

खेडी बुद्रुक येथील आचार्य अत्रेनगरातील हेमंत काळुंखे (वय ६७) मंगळवारी (ता. ७) सकाळी दहाच्या सुमारास हॉटेल त्रिमूर्ती परिसरातील तुकाराम श्रीपाद चौधरी कॉम्प्लेक्स परिसरात आले होते. काम आटोपून ते पुन्हा घराकडे जाण्यासाठी रिक्षात बसले. रिक्षात काळुंखे यांच्याशेजारी बसलेल्या तीन भामट्यांनी त्यांच्या शर्टाच्या खिशातून अलगदपणे मोबाईल काढून घेतला. मोबाईल चोरीला गेल्याचे लक्षात आल्यावर रिक्षाचालक व त्या तिघांचा शोध घेतला. मात्र, काहीएक उपयोग न झाल्याने श्री. काळुंखे यांनी दिलेल्या तक्रारीवरून एमआयडीसी पोलिसांत गुन्हा दाखल झाला. पोलिस नाईक जितेंद्र राजपूत तपास करीत आहेत.