Jalgaon News: कत्तलीसाठी निर्दयीपणे वाहतूक करून नेत असलेल्या १३ उंटांची सावदा पोलिसांनी कारवाईदरम्यान सुटका केली. या उंटांना अहिंसा गोशाळेत आणले असून, त्याठिकाणी त्यांची सेवा सुरू आहे. (Shelter for 13 camels going for slaughter jalgaon news)

६ डिसेंबरला सायंकाळी सावदा पोलिसांनी केलेल्या कारवाईत हतनूर पुलाजवळ कत्तलीसाठी जाणाऱ्या १३ उंटांना ताब्यात घेतले. या उंटांना आयशर गाडीतून (सीजी १२ बीएच ३२८१) अक्षरशः कोंबून वाहतूक केली जात होती.

निर्दयीपणे त्यांना वाहनातून नेण्यात येत होते. जमा केलेले सर्व १३ उंट सुरक्षिततेच्या दृष्टीने पोलिसांनी अहिंसातीर्थ, रतनलाल सी. बाफना गोसेवा अनुसंधान केंद्र, कुसुंबा येथे दाखल केले असून, त्यांच्यावर उपचार करण्यात आले.

जुनमध्ये वरणगाव पोलिसांनी अशाच पद्धतीने कत्तलीसाठी जाणाऱ्या ११ उंटांची सुटका करून त्यांना अहिंसातीर्थात पाठविले होते. त्यातील गंभीर दुखापत झालेले चार उंट मृत्युमुखी पडले असून उर्वरित सात व आता आश्रयास आलेले १३ अशा २० उंटांची गोशाळेत काळजीपूर्वक सेवा केली जात आहे.

आता उंटांची सेवा

गोशाळेत गाय किंवा गोवंश यांसह म्हशी, रेडे व उंट अशा सर्व प्रकारच्या प्राण्यांची सेवा केली जाते. प्रत्येक पशु प्राण्यांचा जीव महत्त्वाचा, त्यांना अभयदान देणे हेच अहिंसेचे, पुण्याचे काम समजून या संस्थेचे काम सुरू असते.