जळगाव : आगामी काळात चांदीचे दर प्रतिकिलो एक लाखाच्यावर जाणार असल्याचा अंदाज सोने बाजारात व्यक्त केला जात असल्याने चांदीच्या दरात वाढ होणे सुरू झाले आहे. तीन दिवसांपूर्वी चांदीचा दर प्रतिकिलो ६४ हजार रूपये होता. आज तो ६६ हजार ५०० रूपयांपर्यंत गेला आहे. दरम्यान, यापूर्वी रोज पन्नास ते साठ किलो विकली जाणारी चांदी आता रोज दीडशे ते एकशेसाठ किलोपर्यंत विकली जात आहे.

अनेक नागरिक गुंतवणुक म्हणून सोने, चांदीकडे पहातात. दर कमी झाले की सोने-चांदी घेतात आणि भाव वाढले की विकतात. यामुळे खरेदी-विक्री दरतील फरक म्हणजे त्यांचा नफा, असे गुंतवणूकदारांचे गणित असते. काही दिवसांपासून चांदीचे दर एक लाख प्रतिकिलो जातील, असा अंदाज सोने बाजाराने वर्तविला आहे. यामुळे नागरिकांकडून चांदीला मागणी दिवसेंदिवस वाढत आहे. शहरासह जिल्ह्यातील सराफी दुकानांत अचानक चांदीला मागणी वाढली असल्याचे सांगण्यात आले. सध्या चांदीचा दर ६६ हजार ५०० प्रतिकिलो आहे. दोन दिवसांपूर्वी चांदी ६४ हजार प्रतीकिलो अशी होती.