जळगाव : जिल्ह्यातील विविध तालुक्यातून दुचाकींची चोरी (Bike theft) करून कवडीमोल भावात विक्री करणाऱ्या टोळीतील तिघांना स्थानिक गुन्हेशाखेच्या पथकाने अटक केली आहे. (stolen vehicles Three members of gang were arrested Jalgaon crime news)

दुचाकी चोरींच्या गुन्ह्यांमध्ये दिवसागणिक वाढ होत असल्याने पोलिस अधीक्षक डॉ. प्रवीण मुंढे यांनी दुचाकी चोरट्यांचा शोध घेण्याच्या सूचना गुन्हे शाखेला केल्या होत्या. त्यानुसार यावल तालुक्यातील अंजाळे येथील दोन तरुण हे दुचाकी चोरी करून विक्री करत असल्याची गुप्त माहिती स्थानिक गुन्हे शाखेचे निरीक्षक किरणकुमार बकाले यांना मिळाली. त्यांच्या पथकातील अंमलदार दीपक पाटील, महेश महाजन, नंदलाल पाटील, किरण धनगर, प्रमोद लाडवंजारी, भगवान पाटील, अशोक पाटील यांच्या पथकाने माहितीचा पाठपुरावा करत अंजाळे गाठले.

अंजाळे येथून तुषार संतोष सपकाळे (वय २२), तेजस विकास सपकाळे (वय २०, दोघे रा. अंजाळा, ता. यावल) या दोघांना ताब्यात घेतले. पोलिसी खाक्या दाखवताच त्यांनी फैजपूरच्या गुन्ह्याची कबुली दिली. त्यांच्याकडून वाहने हस्तगत करण्यात आली आहे. त्यांचा साथीदार व राहुल श्‍याम मोरे (वय २०, रा. हनुमंतखेडाल, ता. एरंडोल) याचे नाव पुढे आल्याने त्यालाही लागलीच ताब्यात घेण्यात आले. अटकेतील तिघांना अधिक तपासासाठी यावल पोलिसांच्या ताब्यात देण्यात आले आहे.