यावल (जि. जळगाव) : तालुक्यातील मालोद ग्रामपंचायतीमध्ये लावण्यात आलेल्या सीसीटीव्ही कॅमेरा व एलईडी टीव्ही आणि कॅमेराचा डिव्हाईस चोरट्यांनी लांबवला आहे. ही घटना शनिवारी ( ता.२८) सकाळी उघडकीस आली. यात ३५ हजाराचे साहित्य चोरीस गेले आहे. या प्रकरणी येथील पोलिस ठाण्यात गुन्हा दाखल करण्यात आला असून, शेजारीच असलेल्या जिल्हा परिषद शाळेचा टीव्ही देखील भामट्यांनी लांबविला आल्याचे निदर्शनास आले आहे. (Malod Grampanchayat News)

मालोद (ता. यावल) या ग्रामपंचायतीच्या वतीने ग्रामपंचायत चौक आणि परिसरात होणाऱ्या हालचाली टिपण्यासाठी सीसीटीव्ही कॅमेरे लावण्यात आले होते. या सीसीटीव्ही कॅमेऱ्याचे डिव्हाइस ग्रामपंचायत कार्यालय आणि सीसीटीव्हीद्वारे होणाऱ्या हालचाली पाहण्यासाठी एक एलईडी टीव्ही लावण्यात आला होता. ग्रामपंचायत कार्यालयात हे सर्व साहित्य होते. शनिवारी (ता. २८) सकाळी ग्रामपंचायत कार्यालयात शिपाई कुरबान तडवी हे साफसफाई करण्यासाठी गेले असता त्यांना ग्रामपंचायतचा दरवाजा उघडा दिसला व आत जाऊन पहिले तर ग्रामपंचायतीमध्ये बाहेर लावण्यात आलेल्या सीसीटीव्ही कॅमेरा, आतील एलईडी टीव्ही व सीसीटीव्ही कॅमेराचा डीव्हीआर हे जागेवर दिसून आले नाहीत. हे पाहून त्यांनी तातडीने ग्रामसेवक राजू तडवी यांना यासंदर्भात माहिती दिली. श्री तडवी यांनी या ठिकाणी पाहणी केल्यानंतर पोलिसांना घटनेची माहिती दिली. घटनास्थळी पोलिस ठाण्याचे प्रभारी पोलिस निरीक्षक आयपीएस अधिकारी अजित कांबळे, पोलिस कर्मचारी नरेंद्र बागूले हे पथकासह दाखल झाले. त्यांनी या ठिकाणी पाहणी करीत पंचनामा केला. ग्रामपंचायतीतून एकूण ३५ हजाराचे साहित्य चोरट्यांनी लांबविले आहे.

या प्रकरणी ग्रामसेवक राजू तडवी यांच्या फिर्यादीवरून गुन्हा दाखल करण्यात आला आहे. सहाय्यक फौजदार अजित शेख, नरेंद्र बागूले हे तपास करीत आहेत. ग्रामपंचायत लगत जिल्हा परिषद शाळा आहे. या शाळेत देखील एका शिक्षकाने आपल्या घरातील टीव्ही आणून ठेवला होता. या शाळेत ठेवण्यात आलेला टीव्ही देखील चोरट्यांनी लांबवला आहे. गावात अशा प्रकारे ग्रामपंचायत व जिल्हा परिषद शाळेत चोरी झाल्याने नागरिकांमध्ये भीतीचे वातावरण निर्माण झाले आहे.