यावल (जि. जळगाव) : जेवण करत असताना ताटात कोंबडीने उडी टाकली आणि भावाभावात भांडण झाले. या वेळी इतर दोघांनी गैरसमजातून एकाला बेदम मारहाण केली. याप्रकरणी येथील पोलिस ठाण्यात दोन जणांविरुद्ध गुन्हा दाखल करण्यात आला आहे. (Latest Marathi News)

तालुक्यातील टेंभी कुरण येथील गोविंदा राजेश सोनवणे यांनी पोलिस ठाण्यात दिलेल्या फिर्यादीनुसार, ते आपल्या घरात जेवण करत होते. जेवण सुरू असताना त्यांच्या भावाच्या कोंबडीने त्यांच्या ताटामध्ये उडी मारली. यामुळे संतापाच्या भरात गोविंदा सोनवणे यांनी यांच्या भावाशी वाद घातला. दरम्यान, त्यांच्या शेजारी राहणारे अरुण संतोष भांगरे व प्रवीण संतोष भांगरे या दोघांना वाटले की हा आम्हाला शिवीगाळ करतोय म्हणून या दोघांनी गोविंदा सोनवणे यांना लाकडी दांड्याने मारून दुखापत केली.तेव्हा गोविंदा सोनवणे यांनी दिलेल्या फिर्यादीवरून येथील पोलिस ठाण्यात अरुण भांगरे व प्रवीण भांगरे यांच्याविरुद्ध गुन्हा दाखल करण्यात आला आहे.