जिवन चव्हाण : सकाळ वृत्तसेवा

चाळीसगाव (जि. जळगाव) : क्षुल्लक कारणावरून पत्नीने पतीच्या डोक्यात लोखंडी मुसळ घालून जबर मारहाण केल्याचा धक्कादायक प्रकार शहरातील हुडको कॉलनीत उघडकीस आला आहे. याप्रकरणी चाळीसगाव शहर पोलिसात पत्नीविरोधात गुन्हा दाखल करण्यात आला आहे. (Latest marathi news)

याबाबत सविस्तर वृत्त असे,

शहरातील हुडको कॉलनीत बंडू ज्ञानेश्वर वाघ (वय-४०) हे परिवारासह वास्तव्यास आहे. एका खासगी कंपनीत काम करून ते कुटुंबाचा उदरनिर्वाह करीत असतात. दरम्यान वाघ यांच्या पत्नी अनिता वाघ गेल्या पाच दिवसांपासून शेजारील दवाखान्यात सिस्टर म्हणून कामाला जाते. दि. ७ जुलै रोजी रात्री ९:३० वाजताच्या सुमारास पत्नी कामावरून घरी आली. तेव्हा त्यांनी पतीकडून १०० रुपयांची मागणी केली. मात्र पतीजवळ ५० रुपये असल्याने ते घेऊन निघून गेली. परंतु थोड्यावेळाने त्या पुन्हा घरी आल्या. व पतीला शिवीगाळ करायला सुरुवात केली.

पती बंडूने शिवीगाळ का करत असल्याचे विचारणा केली असता. त्याचाच राग येऊन घरात पडलेल्या लोखंडी मुसळीने पती बंडू यांच्या खांद्यावर, डोक्यावर जबर मारहाण केली. यामुळे बंडू यांच्या डोक्यातून रक्तस्राव होऊ लागला. त्यावर त्याला तातडीने एका खासगी दवाखान्यात उपचारकामी दाखल करण्यात आले. प्रकृतीत सुधारणा झाल्यानंतर बंडू वाघ यांनी चाळीसगाव शहर पोलीस स्थानक गाठून पत्नीविरोधात गुन्हा दाखल केला आहे. पोलीस निरीक्षक संजय ठेंगे यांच्या निर्देशानुसार पुढील तपास सुरु आहे.