Jalgaon Accident News : रंग घेवून मोताळा येथे निघालेल्या प्रवासी रिक्षाला भरधााव कारने पाठीमागून धडक दिली. नशिराबादला मुंजोबा मंदिराजळ उड्डाणपुलावर झालेल्या या अपघातात एक महिला ठार झाली, तर अन्य चार प्रवासी जखमी झाले आहे.(woman dead due to accident by car jalgaon accident news )

आस्माबी शेख मंजूर (वय ३०, रा. बोरखेडी, ता. मोताळा, जि. बुलढाणा) असे मृत महिलेचे नाव आहे. बुधवारी (ता. ११) सायंकाळच्या सुमारास जळगावहून प्रवासी व रंग घेऊन निघालेली रिक्षा (एमएच १९, बीयू ५८४३) भुसावळकडे जात होती.

याचवेळी पाठीमागून भरधाव वेगाने जाणाऱ्या कारने (एमएच १९, इए ५१०९) उड्डाणपुलावर रिक्षाला पाठीमागून जोरदार धडक दिली.ही धडक इतकी जोरात होती की, रिक्षा उलटून त्यातील प्रवासी महिला आस्माबी यांचा जागीच मृत्यू झाला.

तर त्यांच्यासोबत असलेले अन्य चार प्रवासी गंभीर जखमी झाले. घटनेची माहिती मिळताच परिसरातील नागरिकांसह नशिराबाद पोलीस ठाण्याचे सहाय्यक पोलीस निरीक्षक रामेश्‍वर मोताळे, सहाय्यक फौजदार हरिष पाटील यांनी घटनास्थळी धाव घेत जखमींना तत्काळ शासकीय वैद्यकीय महाविद्यालय व रुग्णालयात दाखल केले.

जखमींमध्ये जुबेर शेख मेहबुब शेख (वय ४०), करीम बेग शरीफ बेग (वय २९), शेख सादीक शेख इसार (वय ४०) व शेख उमेमा शेख जुबेर (वय ६) यांचा समावेश असून, त्यांच्यावर खासगी रूग्णालयात उपचार सुरु आहेत.