Jalgaon Accident News : म्हसावद (ता. जळगाव) फाट्याजवळ अचानक कुत्रा आडवा आल्याने दुचाकी घसरून पडली अन्‌ या अपघातात दुचाकीवरील महिला जागीच ठार झाली.

चित्राबाई शालीग्राम पाटील (वय ३०, रा. ताडेपुरा, अमळनेर) असे या महिलेचे नाव असून, दुर्दैव असे की, दोनच महिन्यांपूर्वी त्यांच्या पतीचे निधन झाले आहे. त्यामुळे अवघ्या दोन महिन्यांच्या अंतराने मातृ-पितृ छत्र हरपून त्यांची दोन्ही अपत्य अनाथ झाली आहेत. (women killed in accident due to dog jalgaon news)

याबाबत जिल्हा रुग्णालयात संबंधितांच्या परिचितांनी माहिती दिली. त्यानुसार चित्राबाई ह्या परिवारासह ताडेपुरा, अमळनेर येथे वास्तव्यास होत्या. त्यांच्या पतीचे दोन महिन्यांपूर्वीच निधन झाले आहे. गेल्या शनिवारी (ता. ३०) सायंकाळी सातच्या सुमारास त्या मामेभाऊ व मुलासोबत दुचाकीने म्हसावद फाट्याजवळून जात होत्या.

त्यावेळी दुचाकीसमोर अचानक कुत्रा आडवा आला. त्यामुळे अचानक ब्रेक दाबल्याने दुचाकी घसरून चित्राबाई खाली पडल्या.

दुचाकीसह घसरत जावून आपटल्याने त्यांच्या डोक्याला जबर दुखापत होऊन त्यांचा मृत्यू झाला. त्यांच्या मागे एक मुलगा आणि एक मुलगी असा परिवार आहे. दरम्यान, या हृदयद्रावक घटनेची अद्याप पोलीस ठाण्यात नोंद झालेली नाही.

मोकाट कुत्र्यांचा बंदोबस्त नाहीच

जळगाव महापालिका असो की जिल्ह्यातील ग्रामपंचायती किंवा जिल्‍हापरिषदेचा आरोग्य विभागही मोकाट जनावरांवर कारवाई करण्यास पुर्णतः अकार्यक्षम आहेत. महामार्गालगतीची गावे तर या मोकाट जनावरांमुळे मृत्युचे सापळे बनले आहेत. मोकाट कुत्र्यांसह इतर पशु महामार्गावर, राज्य मार्गावर येणार नाहीत, यासाठी विशेष प्रयत्न होण्याची अपेक्षा आता व्यक्त होवु लागली आहे.