जळगाव : महाआवास अभियान हे राज्य शासनाचा महत्त्वाकांक्षी कार्यक्रम असल्यामुळे सर्व स्तरांवरील यंत्रणांनी सक्रिय सहभाग द्यावा, आदर्श घरांच्या निर्मितीसाठी उत्कृष्टपणे काम करण्यात यावे, असे आवाहन पालकमंत्री गुलाबराव पाटील यांनी केले.

जिल्हाधिकारी कार्यालयाच्या सभागृहात आयोजित ऑनलाइन कार्यशाळेत अधिकारी व लोकप्रतिनिधींशी ते बोलत होते. जिल्हा प्रशासनाने मंजुरी दिलेल्या ७१ टक्के घरकुलांचे कामे पूर्ण झाली. उर्वरित कामांना गती देण्याचे निर्देश पालकमंत्र्यांनी दिले.

पालकमंत्री पाटील म्हणाले, की ग्रामीण भागातील भूमिहीन लाभार्थ्यांना घरकुल बांधण्यासाठी जागा उपलब्ध करून देण्याबाबत सर्वतोपरी प्रयत्न करावे. प्रत्येक जिल्हा परिषद गटात एक तरी बहुमजली गृहसंकुल (अपार्टमेंट) तयार करावे, प्रत्येक जिल्हा परिषद गटात वाळूला पर्याय म्हणून सँड बँक निर्मिती करावी, पंचायत समिती गणनिहाय लाभार्थ्यांचे वेळोवेळी मेळावे घेऊन त्यांच्या अडचणी समजून घ्याव्यात, जिल्ह्यातील प्रत्येक घरकुलधारकाला जनजीवन मिशनअंतर्गत नळजोडणी करून द्यावी, जिल्हास्तरावर डेमो हाऊस तयार करावे, वाळूसहित इतर बांधकाम साहित्यांची उपलब्धता बहुमजली इमारत गृहनिर्माण वसाहती डेमो हाऊस, परिस्थितीनुसार घरांची रचना नैसर्गिक आपत्तीरोधक असे नवं तंत्रज्ञान इत्यादी नावीन्यपूर्ण बाबींचा या अभियान कालावधीत प्रभावी अंमलबजावणी करण्यात यावी.

जिल्हाधिकारी अभिजित राऊत, मुख्य कार्यकारी अधिकारी डॉ. पंकज आशिया, निवासी उपजिल्हाधिकारी राहुल पाटील, स्नेहा कुडचे, उपजिल्हाधिकारी शुभांगी भारदे, जिल्हा ग्रामीण विकास यंत्रणेचे प्रकल्प संचालक मीनल कुटे, जिल्हा परिषद सदस्य पवन सोनवणे आदींनी सहभाग नोंदविला.

५१ हजार ४७४ घरांचे काम पूर्ण

प्रधानमंत्री आवास योजना व राज्यपुरस्कृत आवास योजनेंतर्गत २०२०-२१ व सन २०२१-२२ या दोन वर्षांत एकही घरकुल बांधकामासाठी प्रलंबित नाही. २०१६-१७ ते २०१९-२० या चार वर्षांत चार हजार २० घरकुले जागेअभावी व इतर तांत्रिक बाबींमुळे बांधकामासाठी प्रलंबित आहेत. ९७ हजार ७६४ घरकुलांच्या उद्दिष्टांपैकी ७३ हजार ४५ घरकुलांना जिल्हा प्रशासनाने मंजुरी दिली असून, ५१ हजार ४७४ (७१टक्के) घरकुल बांधकाम पूर्ण झालेले आहेत. उद्दिष्टांपैकी २४ हजार ७१९ घरकुलांना मंजुरीबाबत तातडीने उपाययोजना करण्याचे निर्देश पालकमंत्री पाटील यांनी दिले.