पाचोरा (जि. जळगाव) : शेवाळे (ता. पाचोरा) येथील २५ वर्षीय युवकाचा शेती काम करीत असताना सर्पदंश होऊन मृत्यू झाल्याची घटना काल (ता. १७) घडली. याबाबत पोलिसांनी अकस्मात मृत्यूची नोंद केली आहे.

प्रवीण निकम असे मृत युवकाचे नाव असून ते डोंगरगाव शिवारातील आपल्या शेतात बाजरी कापणीसाठी गेले होते. विहिरीजवळ पाणी घेण्यासाठी गेले असता त्यांना विषारी सर्पाने दंश केल्याने ते बेशुद्ध पडले. बराच वेळ झाला तरी ते परत येत नाही म्हणून त्यांचे भाऊ एकनाथ निकम हे त्यांना पाहण्यासाठी गेले असता, ते विहिरीजवळ बेशुद्ध अवस्थेत आढळले. त्यांना तत्काळ ग्रामीण रुग्णालयात दाखल केले असता, डॉ. अमित साळुंखे यांनी त्यांना मृत घोषित केले. मयत प्रवीण निकम यांच्या पश्चात आई, भाऊ, पत्नी, मुलगी असा परिवार आहे.