जळगाव : चुलत मामाच्या मुलीसोबत प्रेमसंबंध ठेवत लग्नाला नकार देणाऱ्या नीलेश मंगलसिंग गायकवाड (रा. लोहारा, ता. पाचोरा) याच्याविरुद्ध अखेर दिव्या जाधव या तरुणीच्या आत्महत्येप्रकरणी गुन्हा दाखल झाला आहे. मयत दिव्याच्या मोबाईलमध्ये दोघांचे कॉल रेकॉर्डिंग, व्हिडिओ-फोटो आढळून आले असून पोलिसांनी मोबाईल ताब्यात घेतला. शेवटचे बोलणे नीलेशसोबत झाल्याचे आढळून आले आहे. (Latest Marathi News)

पाचोरा तालुक्यातील तारखेडा येथील दिव्या दिलीप जाधव (वय २१) ही आई-वडिलांसह गावात वास्तव्याला होती. तिच्या चुलत आत्याचा मुलगा नीलेश मंगलसिंग गायकवाड याने लग्नाचे आमिष दाखवून दिव्याचा प्रेमासाठी होकार मिळवला. भूलथापा देत तिच्याशी दोन वर्ष प्रेमसंबंध ठेवले. दिव्याच्या कुटुंबीयांनी नीलेश गायकवाड यांच्या घरी जाऊन लग्नाबाबत मागणी घातली. मात्र, मुलाच्या आईने त्यास स्पष्ट शब्दात नकार देत त्यांना पिटाळून लावले. २३ जून रोजी राहत्या घरात दिव्या जाधव(वय २१) या तरुणीने पंख्याला गळफास घेतला.

दिव्याचा मोबाईल ताब्यात

मयत दिव्या जाधव या तरुणीकडे असलेल्या मोबाईलमध्ये कुटुंबीयांनी पाहणी केल्यावर त्यांना नीलेश व दिव्याचे लग्नासंबंधीचे कॉल रेकॉर्डिंग, दोघांचे फोटो, व्हिडिओ आणि एसएमएस मिळून आले आहेत. याबाबत पंचनामा करुन पुरावे संकलित करण्यात आले आहेत. सोमवारी (ता. १८) दिव्याची आई राधाबाई यांच्या तक्रारीवरुन जळगाव शहर पोलिस ठाण्यात नीलेश याच्याविरुद्ध गुन्हा दाखल झाला आहे.