यावल (जि. जळगाव) : तालुक्यातील कोरपावली येथील ३८ वर्षीय शेतकऱ्याच्या तरुण मुलाने स्वतः व वडील कर्जबाजारी असल्याने विष घेतले. ही घटना १२ जूनला घडली. दरम्यान, उपचार सुरू असताना या तरुणाचा गुरुवारी (ता. १६) रात्री मृत्यू झाला.

कोरपावली येथील संजय ऊर्फ बाळू रमेश महाले (वय ३८) याच्यावर एका खासगी फायनान्स कंपनीचे कर्ज होते. तसेच त्याच्या वडिलांवर देखील बँकांचे कर्ज आहे. हा कर्जाचा डोंगर कसा पेलवला जाणार, या चिंतेपायी राहत्या घरात १२ जूनच्या रात्री विष प्राशन केले. कुटुंबीयांच्या लक्षात ही बाब आल्याने त्यास तत्काळ जळगाव येथील रुग्णालयात उपचारार्थ दाखल केले. दरम्यान, उपचारा सुरू असताना गुरुवारी (ता. १६) जूनला त्याचा मृत्यू झाला. याबाबत पोलिसात अकस्मात मृत्यूची नोंद करण्यात आली आहे. मृत संजयच्या पश्चात आई, वडील, पत्नी, मुलगी, मुलगा, भाऊ असा परिवार आहे.