कळमसरे (ता. अमळनेर) : इंदूरवरून अमळनेरला येणारी अमळनेर आगाराची बस मध्य प्रदेशातील खरगोन आणि धार जिल्ह्याच्या सीमेनजीक नर्मदा नदीत कोसळली. या अपघातात पाडळसरे (ता. अमळनेर) येथील अविनाश संजय परदेशी प्रवास करीत होता. भावाच्या वाढदिवसासाठी तो इंदूरला गेला होता. गावी परतताना अविनाशने भ्रमणध्वनीवर स्टेट्‌स ठेवले होते. ते अखेरचे ठरले. (Latest Marathi News)

पाडळसरे येथील अविनाश परदेशी (वय २४ ) हा तीन ते चार दिवसांपासून इंदूर येथे स्थायिक असलेल्या मावशीकडे गेला होता. त्याचा लहान भाऊ तिथे कामानिमित्त वास्तावास आहे. लहान भावाच्या वाढदिवसाला अविनाश गेला होता. नेमका अविनाश सोमवारी याच बसने परत गावी येण्यासाठी निघाला आणि आपल्या मोबाईलवर त्याने मराठीत ‘वे टू पाडळसरे’, असे स्टेट्स ठेवत प्रवासाला सुरवात केली. मात्र, नियतीला वेगळेच मान्य असेल आणि या अपघातात त्याच्यावर काळाने झडप घातली आणि त्याच्या मोबाईलवरील स्टेट्स अखेरचे ठरले.

त्याच्या अकाली एक्झिटने संपूर्ण पंचक्रोशीतील जनसमुदाय शोकमग्न झाला आहे. अविनाशची घरची परिस्थिती अत्यंत हलाखीची असून, कळमसरे येथे तो कपड्यांना इस्त्री करून उदरनिर्वाह करीत होता. घरात तो कर्ता असल्याने त्याच्या घरच्यांचा आक्रोश मन हेलावणारा होता. त्याच्या मागे वृद्ध आजी, अर्धांगवायू झालेले आजोबा, आई व लहान भाऊ असा परिवार आहे. घरातील कर्ता गेल्याने परिवारावर दुःखाचा डोंगर कोसळला आहे.