कळमसरे (ता. अमळनेर) : येथील दर्शन मोतीलाल चौधरी अपघात झालेल्या इंदूर-अमळनेर याच बसने प्रवास करणार होता. मात्र, पाऊस सुरू असल्याने त्याला बहिणीने थांबविल्याने त्याचे प्राण वाचले. भावाप्रति काळजी घेणाऱ्या बहिणीची वेडी माया असते, त्याची प्रचिती आली. (Indore Bus Accident)

येथील दर्शन चौधरी गेल्या पाच ते सहा दिवसांपासून इंदूरला असलेल्या बहिणीला भेटायला गेला होता. वडील मोतीलाल चौधरी यांनी रविवारी (ता. १७) दर्शनला घरी येण्यासाठी फोन केला होता. अमळनेर-इंदूर बसने सकाळी येतो, असे त्याने वडिलांना सांगितले अन्‌ सोमवारी (ता. १८) सकाळी संबंधित बसने यायला निघाला. बस सुटेल, म्हणून घाई करणाऱ्या भाऊरायाला बहिणीने पाऊस सुरू आहे. उशिरा नीघ, सांगत दर्शनला थांबविले अन्‌ ही घटना टळली. एकुलता एक भाऊ बहिणीच्या काळजीने या अपघातातून वाचला. (Latest Marathi News)

दरम्यान, उशिराने दर्शन कळमसरे येथे पोचल्याने त्याला भेटण्यासाठी ग्रामस्थांनी मोठी गर्दी केली होती. आपल्या मोठ्या बहिणीने आणि पाहुण्यांनी सोमवारी सकाळी काळजीपोटी मला थांबविले नसते, तर मीही या वाईट दुर्घटनेत वाचू शकलो नसतो, असे म्हणत घरी आल्यावर त्याने आपल्या आई-वडिलांना मिठी मारली. या वेळी त्याला अश्रू अनावर झाले होते.