वारजे - आईच्या प्रेमासाठी व तिला भेटण्यासाठी सायकलवरून निगडीला निघालेल्या अवघ्या दहा वर्षांच्या मयूरला पोलिसांनी मदतीचा हात दिला आणि तो सुखरूप आईच्या कुशीत विसावला.

मागील दोन वर्षांपासून मयूर लांडगेचे आई-वडील कौटुंबिक वादामुळे वेगळे राहतात. मयूर हा वडिलांसोबत धायरीत राहतो, तर आई माहेरी निगडीत राहते.
दोन वर्षांपासून आईची भेट झाली नसल्याने तिला भेटायला तो सायकलवरून निघाला. धायरी, वडगाव, वारजे करत तो महामार्गाच्या रस्त्याने चांदणी चौक येथे पोहोचला. मात्र, रात्र झाल्याने त्याला पुढे रस्ता समजण्यास अडचणी आल्या, त्यामुळे चांदणी चौक येथे तो रडत बसला. त्याला त्याच्या आईचा पत्तादेखील पूर्ण माहिती नव्हता. वारजे पोलिस स्टेशनचे बीट मार्शल अजय कामथे व नितीन कातुर्डे हे दोघे येथे गस्त घालत असताना, मयूर त्यांच्या निर्दशनास आला. पोलिस निरीक्षक प्रकाश खांडेकर यांच्या मार्गदर्शनानुसार महिला कर्मचारी अर्चना पारखे, वैशाली मेमाणे, ज्योती थोरात यांनी त्याच्याशी संवाद साधून घडलेल्या प्रकार जाणून घेतला. आईच्या कुशीत विसावण्यासाठी मयूरने केलेली धडपड पाहून पोलिसांचे डोळेदेखील पाणावले. वारजे पोलिसांनी त्याच्या आई-वडिलांचा शोध घेऊन त्यांची समजूत काढली. मुलाच्या प्रेमाखातर त्याला आईकडे सोपवण्यात आले.