मोरगिरी (जि. सातारा) : जिल्ह्यातील कोरोना बाधित रुग्णांच्या संख्येत झपाट्याने वाढ होत असून सातारा जिल्ह्यात कोरोनाचा उद्रेक झाला आहे. बुधवारी रात्री आलेल्या अहवालात एकूण 817 रुग्ण पॉझिटिव्ह आले आहेत. दिवसभरात 738 जणांना बरे झाल्याने घरी सोडण्यात आले आहे. तर 21 जणांचा मृत्यू झाला आहे. जिल्ह्यात कोरोनाचे संकट वाढत असताना व गावे स्वयंस्फूर्तीने बंद पाळत असताना नागरिक बेफिकीरीने वागत आहेत. त्यामुळे पोलिसांनी मास्क न वापरणा-या, तसेच सोशल डिस्टन्स न पाळणा-या लोकांवर कारवाई वाढवली आहे.

कोरोनोच्या याच पार्श्वभूमीवर पाटण विधानसभा मतदारसंघातील ग्रामीण रुग्णालये, प्राथमिक आरोग्य केंद्र व कोविड रुग्णालयातील डॉक्‍टरांना पीपीई किट व ग्रामीण भागातील जनतेसाठी तापमोजण्याचे यंत्र आणि च्यवनप्राशचे डबे राज्याचे नगरविकासमंत्री एकनाथ शिंदे, गृह राज्यमंत्री शंभूराज देसाई यांच्या वतीने प्रशासनाकडे सुपूर्द करण्यात आले. त्यांच्या वतीने कोरोनाबाधित रुग्णांना हाताळण्यासाठी 1200 पीपीई किट, तालुक्‍यातील जनतेसाठी 400 तापमान मोजण्याचे यंत्र आणि एक हजार च्यवनप्राशचे डबे देण्यात आले. प्रांताधिकारी श्रीरंग तांबे, तहसीलदार समीर यादव, तालुका वैद्यकीय अधिकारी डॉ. बी. आर. पाटील उपस्थित होते.

प्राथमिक शिक्षकांच्या बदलीत गैरव्यवहार?; जिल्हा परिषदेत सभेत गदाराेळ

यावेळी बोलताना गृह राज्यमंत्री शंभूराज देसाई म्हणाले की, जिल्ह्यात कोरोना बाधितांची संख्या वाढत असून नागरिकांनी सतर्कता बाळगून स्वतःची काळजी घ्यावी. कोरोनाला रोखण्यासाठी प्रशासन वेळोवेळी उपाययोजन करत असून नागरिकांनी यास सहकार्य करावे. रुग्णांचे बचावासाठी प्रशासन शर्तीचे प्रयत्न करत असून नागरिकांनी घाबरुन जाण्याचे काही कारण नसल्याचेही त्यांनी स्पष्ट केले.

संपादन : बाळकृष्ण मधाळे