साडवली (रत्नागिरी) : देवरूख नगरपंचायतद्वारे दीनदयाळ अंत्योदय योजनेचा फायदा नागरिकांना होत आहे. स्वयंरोजगार वैयक्‍तिक या गटात २८ लाभार्थ्यांना स्वयंरोजगारासाठी बॅंकेमार्फत ३८ लाख ९२ हजार रुपये अर्थसाहाय्य देण्यात आले आहे. यापुढे ज्या लाभार्थ्यांना बॅंक अर्जाची आवश्‍यकता आहे त्यांनी नगरपंचायत कार्यालयाशी संपर्क करण्याचे आवाहन करण्यात आले आहे. 

राष्ट्रीय नागरी उपजीविका अभियानांतर्गत शहरी गरीब नागरिकांना उपजीविकेच्या जास्तीत जास्त संधी उपलब्ध करून देण्यासाठी स्वयंरोजगार वैयक्‍तिक या उपांगात देवरूख शहरातील सुधाकर किर्वे, चेतन खाके आणि वसंत बडद यांना रिक्षा व जनरेटर खरेदीसाठी बॅंक आफ महाराष्ट्र आणि बॅंक आफ इंडिया यांच्यामार्फत अर्थसाहाय्य उपलब्ध करून देण्यात आले. 

हेही वाचा - गोव्यात कांदे घेऊन येतो आणि जाताना दारू नेतो ; संशयिताच्या उत्तराने पोलीसच झाले आवाक -

भाजप नगराध्यक्षा मृणाल शेट्ये यांच्या कार्यकाळात व पाठपुराव्यामुळे ६० महिला स्वयंसाहाय्यता गटांची स्थापना करण्यात आली असून ५१ गटांना नगरपंचायतीमार्फत प्रतिगट दहा हजार रुपयेप्रमाणे ५ लाख १० हजार रुपये फिरता निधी देण्यात आलेला आहे. तसेच शहरातील महिला ५८ स्वयंसाहाय्यता गटांना विविध बॅंकेमार्फत ७३ लाख ८५ हजार रुपये तर पंतप्रधान पथविक्रेता आत्मनिर्भर निधी योजनेंतर्गत कोरोना कालावधीतील विस्कळित झालेला व्यवसाय पुन्हा सुरू करणे कामी देवरूख शहरातील सर्वेक्षण झालेल्या ७९ फेरीवाल्यांना १० हजार रुपयेप्रमाणे ७ लाख ९० हजार रुपयांचे अर्थसाहाय्य देण्यात आले आहे.

नियमित कर्ज परतफेड करणाऱ्यांना ७ टक्‍के व्याज अनुदान शासनातर्फे दिले जाणार आहे. रिक्षा आणि जनरेटर वितरण सोहळ्याप्रसंगी नगराध्यक्षा मृणाल शेट्ये, उपनगराध्यक्ष सुशांत मुळ्ये, मुख्याधिकारी बालाजी लोंढे, नगरसेविका रेश्‍मा किर्वे, नगरसेवक राजेंद्र गवंडी, वैभव कदम व सहाय्यक प्रकल्प अधिकारी कुमार सरवदे उपस्थित होते.

हेही वाचा -  भावी शिक्षकांमध्ये आनंदाचे वातावरण ; भरतीवरील बंदी उठली -

संपादन - स्नेहल कदम