रत्नागिरी : जिल्हा पोलिस दलातील (ratnagiri district) सहा अधिकाऱ्यांच्या बदल्या झाल्या आहेत. यामध्ये २ पोलिस निरीक्षक व ४ पोलिस उपनिरीक्षकांचा समावेश आहे. रत्नागिरी शहर पोलिस निरीक्षक अनिल लाड व चिपळूण पोलिस निरीक्षक देवेंद्र पोळ या दोघांची रायगड येथे बदली झाली आहे. (konkan Update)

गृह विभागाचे काल सायंकाळी उशिरा यासंदर्भातील आदेश प्राप्त झाले. त्यानुसार संबंधितांना तत्काळ बदलीच्या ठिकाणी हजर होण्याचे आदेशात म्हटंले आहे. रत्नागिरी शहर पोलिस निरीक्षक म्हणून अनिल लाड यांनी आपल्या कार्याचा वेगळा ठसा उमटवला होता. जनतेशी त्यांचे सलोख्याचे संबंध होते. त्यामुळे प्रत्येक सण समारंभात त्यांना मानाचे स्थान दिले जात होते. गुन्हे उघडकीस आणण्यातही त्यांचा हातखंडा होता. शहरातील अनेक गंभीर गुन्हे त्यांनी उघडकीस आणले.

आदोलने, मोर्चे चांगल्या पद्धतीन हाताळले. त्यामुळे नागरिक आणि कर्मचाऱ्यांत त्यांच्याबद्दल आदर होता. चिपळूणचे निरीक्षक देवेंद्र पोळ यांचीही कामाची पद्धत चांगली असल्याने चिपळुणमध्ये त्यांनी जनतेसह कर्मचाऱ्यांशी चांगले संबंध होते. जिल्ह्यातील या दोन्ही अधिकाऱ्यांची बदली झाली आहे.

रत्नागिरी येथे पोलिस उपनिरीक्षक पदी कार्यरत असलेल्या ४ अधिकाऱ्यांच्या बदल्या करण्यात आल्या आहेत. पोलिस उपनिरीक्षक समस बेग, महेश धोंडे, विकास चव्हाण व अस्मिता पाटील या सर्व अधिकारऱ्यांची रायगड येथे बदली करण्यात आली आहे. या सर्व बदली झालेल्या अधिकाऱ्यांना जिल्हा पोलिस अधीक्षक डॉ. मोहितकुमार गर्ग यांनी शुभेच्छा दिल्या.

जिल्ह्यात आलेले पोलिस अधिकारी

जिल्ह्यात येणाऱ्या पोलिस निरीक्षकांमध्ये रवींद्र शिंदे, दादासाहेब घुटुकडे आणि सुजाता तानवडे यांची रायगड येथून रत्नागिरी जिल्ह्यात बदली झाली आहे. पोलिस उपनिरीक्षक विनायक माने यांची पालघर येथून रत्नागिरी, हर्षद हिंगे यांची रायगड येथून रत्नागिरी तर गायत्री पाटील व शितल पाटील यांची सिंधुदुर्ग येथून रत्नागिरी येथे बदली झाली आहे.