राजापूर (रत्नागिरी) : कोरोनाचे संक्रमण रोखण्यासाठी जारी करण्यात आलेल्या लॉकडाऊनमुळे दोन्ही पायांनी अपंग असलेला अब्दुल शेख राजापूर शहरामध्ये अडकून पडला होता. अन्य परप्रातियांप्रमाणे त्याचेही लॉकडाऊनमुळे पुरते हाल झाले होते. मदतीच्या प्रतिक्षेत असलेल्या अब्दुल यांना टायर पंक्चर व्यवसायिक विवेक उर्फ पिंट्या गुरव यांनी राहण्यासाठी स्वतःच्या घराचा आसरा दिला.

एवढेच नव्हे तर स्वतःच्या खिशातून भांडवल उपलब्ध करून देत छोट्यासा व्यवसाय सुरू करण्यास मदत करून त्याला स्वावलंबीही केले. लॉकडाऊनच्या कालावधीमध्ये अपंग निराधाराला आधार देत श्री. गुरव यांनी कृतीद्वारे दाखविलेली माणूसकी इतरांसाठी निश्चितच प्रेरणादायी म्हणावी लागेल.

हेही वाचा- कोणी दहा रुपये दिले तर कोणी दिले पन्नास, जमा झाले हजारो...

शहरातील बंगलवाडी येथील श्री. गुरव यांचा शहरातील बाजारपेठेमध्ये टायर पंक्चर काढणारे ‘ऑन दी स्पॉट पंक्चर’ हे दुकान आहे. या दुकानाच्या माध्यमातून स्वतःचा व्यवसाय सांभाळताना ते विविध सामाजिक संस्थांच्या माध्यमातून सामाजिक उपक्रम राबवितात. सामाजिक बांधिलकी जोपासणारा युवा व्यवसायिक म्हणून से सर्वपरीचित आहेत. लॉकडावूनचा फटका बसलेल्या अनेक गरजवंतांना त्यांनी विविध मार्गाने विविध प्रकारची मदत केली आहे. लॉकडाऊनच्या कालावधीमध्ये श्री. गुरव यांना दोन्ही पायांनी अपंग असलेला अब्दुल शहरातील एस्.टी. स्टॅण्ड परीसरामध्ये भूकेने व्याकूळ झालेल्या स्थितीमध्ये आढळला. त्यांनी त्याच्याशी संवाद साधला असता त्याने आपली सर्व हकीकत सांगताना लॉकडाऊनमुळे आपण अडकून पडल्याचे सांगत मदतीची अपेक्षा व्यक्त केली.

हेही वाचा- मंडणगडातील तिडे-तळेघर गाव सील ; ४० व्यक्ती क्कारंन्टाईन...

त्यानंतर, श्री. गुरव यांनी तातडीने अपंग अब्दुल यांची स्वतःच्या घरी राहण्याची व्यवस्था केली. त्या कालावधीमध्ये अब्दुल याने श्री. गुरव यांच्या पाठीमागे हाताला काहीतरी काम देण्याची मागणी केली.  गुरव यांनी त्याला आपल्या गॅरेजजवळ जीवनावश्यक असलेल्या कांदा, बटाटा व भाजीपाल्याचा स्टॉल टाकून दिला. त्यासाठी लागणारे सर्व भांडवल श्री. गुरव यांनी उपलब्ध करून दिले. यासाठी गुरव यांचे चुलते महेश गुरव आणि पत्नी सौ. विद्या यांचेही सहकार्य लाभले. लॉकडाऊनच्या कालावधीमध्ये अब्दुल याने सुमारे दिड टन एवढा कांदा विकला आहे.

हेही वाचा- हर्णे बंदरात मासळीचे दर घसरले ; व्यापाऱ्यांबबत संताप

शेवग्याच्या शेंगाही विकल्या. त्यातून त्याला सुमारे पाच हजार रुपयांचा फायदा झाला. विवेक यांनी माणूसकीच्या नात्याने केलेल्या मदतीतून अब्दुल यांना निवारा मिळताना आर्थिकदृष्ट्या स्वतःच्या पायावर उभे राहण्याचे बळही मिळाले आहे. त्यातून, त्याला जगण्याची एक नवी उमेद मिळाली आहे. अब्दुल याला मदत करण्याच्या श्री. गुरव यांच्या सामाजिक बांधिलकीचे सर्वस्तरातून कौतुक केले जात आहे.