सावंतवाडी ( सिंधुदुर्ग ) - येथील पालिकेच्या सत्ताधारी नगरसेवक सुधीर आडिवरेकर यांनी पालिका कर्मचारी आसावरी केळबाईकर व दीपक म्हापसेकर यांच्याशी विनापरवाना फळ विक्रीच्या विषयावरून गैरवर्तन व शाब्दीक बाचाबाची केल्याचा प्रकार काल (ता. 13) घडला.

यानंतर कर्मचाऱ्यांनी काम बंद ठेऊन याबाबत निषेध नोंदविला, तर या प्रकाराची शिवसेनेकडून जिल्हाधिकाऱ्यांकडे तक्रार करताना हा प्रकार निंदनीय व दुदैवी असल्याचा आरोप विरोधी गटाच्या गटनेत्या अनारोजीन लोबो व खेमराज ऊर्फ बाबू कुडतरकर यांनी प्रसिध्दी पत्रकातून केला आहे. 

त्यांनी दिलेल्या पत्रकात म्हटले आहे की, जगभरात कोरोनाचे संकट असताना सर्व प्रशासकिय यंत्रणा युध्दपातळीवर काम करीत आहे. पालिकेचे कर्मचारीही जनतेसाठी कोरोनाचा प्रसार रोखण्यासाठी काम करत आहेत; मात्र असे असतांना भाजी विक्रीवरून पालिका कर्मचाऱ्यांबरोबर सत्ताधारी नगरसेवकाकडून गैरवर्तवणुक व शाब्दीक बाचाबाची करणे चुकीचे आहे.

सुधीर आडिवरेकर यांच्याकडून याअगोदरही अशाच प्रकारे कर्मचाऱ्याबरोबर गैरवर्तणुक करण्यात आली होती. हा प्रकार अत्यंत चुकीचा असुन आम्ही त्याचा तीव्र निषेध करतो. याबाबत कर्मचारी संघटनेकडूनही पालकमंत्री उदय सामंत यांचे लक्ष वेधण्यात आले असुन शिवसेनेचे सर्व नगरसेवक कर्मचाऱ्यांच्या पाठीशी ठामपणे उभे राहणार आहोत, तरी प्रशासनाकडून कर्मचाऱ्यांना योग्य मान सन्मान मिळावा, असे म्हटले आहे. 

याबाबत श्री. आडिवरेकर यांना विचारले असता ते म्हणाले, ""मी सावंतवाडीतील कोरोनाच्या पार्श्‍वभुमीवर पालिकेतील अधिकारी व कर्मचारी यांच्याशी चर्चा करत होतो. शहरात बाजारपेठ बंद असतांना विनापरवाना द्राक्षे विक्रेते दुकाने थाटून द्राक्षे विक्री करत होत्या. त्यांना कशी काय दुकाने लावायला दिलीत अशी आपण विचारणा केली. कुठल्याही कर्मचाऱ्याशी उद्घट वागलो नाही. त्यामुळे माझ्यावर करण्यात आलेला आरोप चुकीचा असुन शहरातील नागरिकांची सुरक्षा हे माझे नगरसेवक काम आहे आणि ते मी करत आहे व करणार.'' 

वादावर तोडगा 

येथील बाजारपेठेत विनापरवाना बसणाऱ्या फळ विक्रेत्यांवरून नगरसेवक सुधीर आडिवरेकर यांनी पालिकेच्या मुख्य लिपिक आसावरी शिरोडकर यांना अपशब्द वापरल्यावरून पालिका कर्मचारी संघटनेने काम बंद पुकारले होते. जिल्हाधिकारी यांच्याकडे तक्रार केली होती; मात्र आज कर्मचारी व नगरसेवक यांच्यात नगराध्यक्ष संजू परब यांनी समन्वय घडवून आणत तोडगा काढला.