सावंतवाडी : मुंबई-गोवा महामार्गाच्या (gao-mumbai highway) झाराप-पत्रादेवी बायपासवर वेत्ये तिठा येथे दुचाकीला कारची जोरदार धडक होऊन झालेल्या अपघातात वृद्ध जागीच ठार झाला. (accident) ही घटना आज दुपारी पावणे एकच्या सुमारास घडली. गुरुनाथ राजाराम प्रभूझाटये (वय ८५, रा. आजगांव, ता. सावंतवाडी ) असे मृताचे नाव आहे. इन्सुलीत मुलाला भेटून परतताना त्यांच्यावर काळाने झडप घातली. या अपघातातील मोटार चालक विजयसिंग रामसुमेर सिंग यांनी येथील पोलिस ठाण्यात खबर दिली. पोलिसांनी पंचनामा करून मोटार व दुचाकी ताब्यात घेतली.

अधिक माहिती अशी, की मृत गुरुनाथ प्रभूझाटये हे इलेक्ट्रिक स्कूटरने आज सकाळी आजगावहून इन्सुली येथे राहणाऱ्या आपल्या मुलाच्या घरी गेले होते. तेथून ते वेत्येमार्गे आजगावला जाण्यास निघाले. वेत्ये तिठा येथे ते आले. तेथे एक दुसरी मोटार उभी होती. या उभ्या असलेल्या मोटारीमुळे त्यांनी दुचाकी महामार्गावर पुढे आणली. यावेळी झाराप पत्रादेवी बायपासवरून सुसाट येणाऱ्या इनोव्हाची (जीए ०७ इ १०१६) धडक त्यांच्या दुचाकीला बसली. यात ते रस्त्यावर कोसळले. त्यांच्या डोक्याला गंभीर दुखापत होऊन रक्तस्राव झाल्याने ते जागीच ठार झाले. त्यांच्या दुचाकीचेही मोठे नुकसान झाले. माजी सभापती राजू परब यांच्यासह माजी राज्यमंत्री तथा राष्ट्रवादीचे नेते प्रवीण भाई भोसले, वेत्येचे माजी सरपंच नरेंद्र मिठबावकर, मळगाव उपसरपंच हनुमंत पेडणेकर, वेत्येचे माजी पंच सदस्य बाळू गावडे, भाजपचे बांदा उपाध्यक्ष उमेश पेडणेकर, काँग्रेसचे तालुका उपाध्यक्ष सच्चिदानंद बुगडे, विजय गावडे, प्रसाद नाईक आदी घटनास्थळी पोचले.

सायंकाळी उशिरा अंत्यसंस्कार

सहाय्यक पोलिस उपनिरीक्षक एस. बी. साळुंके, पोलिसनाईक धनंजय नाईक आदी घटनास्थळी दाखल झाले. त्यांनी पंचनामा करून मृतदेह रुग्णवाहिकेतून सावंतवाडी उपजिल्हा रुग्णालयात नेला. विच्छेदनानंतर मृतदेह नातेवाईकांच्या ताब्यात दिला. सायंकाळी उशिरा अंत्यसंस्कार करण्यात आले. गुरुनाथ यांच्या पश्चात पत्नी, दोन मुलगे, दोन मुली, सूना व नातवंडे असा मोठा परिवार आहे. आजगावचे माजी सरपंच अण्णा प्रभू झाटये यांचे ते चुलत काका होत.