रत्नागिरी : कोरोनामुळे गेली दोन वर्षे ठप्प असलेल्या पर्यटन व्यवसायाला गती मिळू लागली आहे. शनिवारी, रविवारी ‘वीकेंड’साठी जिल्ह्यातील समुद्रकिनाऱ्यांकडे पर्यटकांची पावले वळत आहेत. परगावांतील पर्यटकांचा गणपतीपुळे, दापोलीतील किनाऱ्यांवर राबता वाढू लागल्याने व्यावसायिकांत समाधान आहे. मंदिरे सुरू झाल्यावर त्यात वाढ होईल, अशी आशा आहे.

गेल्या महिनाभरात बाधितांची संख्या कमी होत असल्याने शासनाने शिथिलता देण्यास सुरुवात केली. शाळा, मंदिरेही सुरू करण्याचा निर्णय घेतला आहे. दीर्घकाळ चार भिंतीमध्ये राहिलेल्या नागरिकांनाही आता पर्यटनाचे वेध लागलेले आहेत. सुरक्षित आणि कोरोनामुक्त भागात फिरण्याकडे अनेकांचा कल आहे. रत्नागिरी जिल्ह्याचा पॉझिटिव्हिटी दरही कमी असून, कोरोना बाधितांचा आकडाही नियंत्रणात आहे. सध्या वीकेंड पर्यटनालही चालना मिळत असून, काल (ता. २) गांधी व शास्त्री जयंती आणि जोडून रविवार त्यामुळे पर्यटकांनी रत्नागिरी जिल्ह्याकडे फिरण्यासाठी धाव घेतली.

स्थानिकांसह जिल्हाबाहेरील पर्यटकही आता किनाऱ्यांवर मोकळ्या हवेत फिरण्यासाठी गर्दी करताना दिसत आहेत. दापोली, गुहागर, गणपतीपुळे, मालगुंडसह विविध किनारी भागांत पर्यटकांचा राबता दिसू लागला आहे. अजूनही या किनाऱ्यांवर वॉटर स्पोर्टस्, पॅरासेलिंग आणि रत्नागिरीतील स्कुबा डायव्हिंग बंदच असल्याने पर्यटकांची निराशा झाली. घटस्थापनेला मंदिरे सुरू होत असल्याने हॉटेल, रिसॉर्टमध्ये आरक्षणासाठी चौकशीही सुरू झाली असून, पर्यटकांमध्ये मोठ्या प्रमाणात वाढ होणार आहे.

गणपतीपुळेत दर्शनासाठी नियोजन

मंदिरे सुरू होत असल्याने गणपतीपुळे मंदिर व्यवस्थापनाने दर्शनासाठी तीन वेळा निश्‍चित केल्या आहेत. त्यात सकाळी सात ते दुपारी बारा, दुपारी एक ते सायंकाळी सात, त्यानंतर साडेसात ते साडेआठ या वेळेत भाविकांना दर्शन मिळेल. निर्जंतुकीकरण आणि साफसफाईसाठी काही काळ मंदिर बंद ठेवले जाणार आहे. गर्दी टाळणे, मास्क अत्यावश्यक यावर लक्ष ठेवले जाईल.

"पर्यटनाला सुरुवात झाली आहे. पश्‍चिम महाराष्ट्रातील पर्यटक गणपतीपुळेमध्ये येतात. निवास करणाऱ्यांचा टक्का कमी असला, तरीही मंदिर सुरू झाल्यावर त्यात वाढ होईल. सध्याची स्थिती आश्‍वासक आहे."

- उमेश भणसारी, व्यावसायिक, गणपतीपुळे