चिपळूण : गुहागर तालुक्यातील परचुरी येथे आर्किटेक्चर विद्यार्थ्यांनी गावात एकाहून एक अशा अप्रतिम कलाकृती आणि वास्तू साकारल्या आहेत. टाकाऊ वस्तूंचा वापर करीत अवघ्या १० हजारांत नेत्रदीपक, देखणा बसथांबा उभारला आहे. यासाठी विद्यार्थ्यांनी स्वतः श्रमदान करत कमी खर्चात उत्तम कलाकृती साकारता येत असल्याचे दाखवून दिले आहे. प्रात्यक्षिक शिबिरासाठी पनवेल येथील अंजुमन-ए-इस्लाम काळसेकर टेक्निकल कॅम्पसच्या स्कूल ऑफ आर्किटेक्चर महाविद्यालयाचे विद्यार्थी येथे आले होते. बिल्डिंग कन्स्ट्रक्शन विषयातील सर्व मुद्द्यांचा वापर करण्यात आल्याने आकर्षक बसथांबे, ही त्यांच्या शिबिराची देणगी आहे.

पनवेल येथील अंजुमन- इस्लाम काळसेकर टेक्निकल कॅम्पस स्कूल ऑफ आर्किटेक्चरचे प्रथम व द्वितीय वर्षातील विद्यार्थी काही दिवसांपूर्वी गुहागर तालुक्यातील परचुरी येथे आले होते. या विद्यार्थ्यांमध्ये चिपळूण तालुक्यातील काही विद्यार्थ्यांचाही समावेश होता. शिबिरादरम्यान येथील ग्रामस्थांसाठी कायमस्वरूपी स्मरणात राहील, यासाठी काही काम करण्याचा मनोदय विद्यार्थ्यांनी व्यक्त केल्यावर बसथांब्याची सूचना ग्रामस्थांमधून आली होती. त्यानुसार या विद्यार्थ्यांनी परचुरी येथे नेत्रदीपक असा बसथांबा उभारला आहे. यासाठीचा चिरा ग्रामस्थांनी दिला. उर्वरित सर्व बाबी विद्यार्थ्यांनी उपलब्ध केल्या.

बांधकामात नावीन्यता, गायीच्या शेणाचा वापर

रंगकाम करताना गायीच्या शेणात इतर रंग मिसळून आकर्षक, देखणे केलेले रंगकाम अधिक उठावदार दिसते. या बांधकामात बांधकामाच्या पायथ्यापासून छप्परापर्यंत मुंबई विद्यापीठाच्या अभ्यासक्रमात असलेल्या बिल्डिंग कन्स्ट्रक्शन विषयातील सर्व मुद्द्यांचा वापर विद्यार्थ्यांनी स्वतः काम करून पूर्ण केले आहे. या प्रकल्पात कमी खर्चात विविध टाकाऊ वस्तूंचा वापर करून चांगल्या वास्तूंची निर्मिती करता येते, हे दाखवून दिले. यासोबतच बांधकामात नावीन्यताही विकसित केली आहे.

परचुरी येथील शिबिरात विद्यार्थ्यांनी स्वतःच्या कल्पकतेने बसथांब्यांचे बांधकाम केले. याशिवाय पऱ्याच्या ठिकाणी दगडांमध्ये कोरीव काम करून परिसर सुशोभित करण्याचा प्रयत्न केला. बांधकामासाठी अनेक टाकाऊ वस्तूंचा वापर करून नेत्रदीपक काम केले आहे.

- प्रा. सिद्धेश कोळबंकेर, मार्गदर्शक.