वैभववाडी (सिंधुदुर्ग) : जमिनीच्या वादातून जांभवडेतील आकाराम रामकृष्ण पवार (वय ६४) यांच्यावर प्राणघातक हल्ला करण्यात आला. यात ते गंभीर जखमी झाले असून, त्यांच्यावर कणकवली येथील रुग्णालयात उपचार सुरू आहेत. या प्रकरणी पोलिसांनी सहा जणांवर गुन्हा दाखल केला. हा प्रकार काल रात्री पावणेबाराच्या सुमारास झाला.

या प्रकरणी पोलीसांनी मानाजी रघुनाथ पवार, धनाजी रघुनाथ पवार, सुर्याजी परशुराम पवार, प्रकाश मानाजी पवार, शिवाजी रघुनाथ पवार यांच्यासह आणखी एकावर गुन्हा दाखल केलेला आहे. जांभवडेतील आकाराम पवार आणि मारहाणकर्ते यांच्यामध्ये गेल्या काही वर्षांपासून जमिनीचा वाद सुरू आहे. 
आकाराम पवार यांनी यासंदर्भात न्यायालयात दावा केलेला आहे. त्याची सुनावणी बुधवारी होती. पवार यांचे कुटुंबिय मुंबईला असल्याने ते जेवणासाठी कोळंब येथील नातेवाईकांकडे गेले होते. रात्री उशिरा जेवण आटोपुन पवार आणि त्यांचा भाचा वैभव आरडे घरी परतत असताना त्यांच्यावर या सहाही जणांनी लोखंडी सळी, दांड्याने मारहाण करण्यास सुरवात केली. 

हेही वाचा - २५ लाख कर्जाची परतफेड ५५ लाख देऊन केली आणि तरीही अपहरण केले -

सहा जणांनी अचानक हल्ला केल्यामुळे पवार त्यांना प्रतिकार करू शकले नाहीत. त्यांच्या डोक्‍याला गंभीर दुखापत झाली. याशिवाय अन्य ठिकाणी सुध्दा मार बसला आहे. त्यांना तत्काळ येथील ग्रामीण रूग्णालयात उपचाराकरीता दाखल करण्यात आले. तेथे प्राथमिक उपचार केल्यानंतर त्यांना अधिक उपचाराकरीता कणकवलीला हलविण्याचा सल्ला डॉक्‍टरांनी दिला. त्यानुसार त्यांना कणकवलीला नेण्यात आले.
या प्रकरणी पोलीसांनी सहाही जणांवर गुन्हे दाखल केले आहेत. अधिक तपास पोलीस निरीक्षक अतुल जाधव यांच्या मार्गदर्शनाखाली पोलीस उपनिरीक्षक प्रवीण देसाई करीत आहेत.

संपादन - स्नेहल कदम